قازۇۋ-دە حاينان پروۆينتسياسىنىڭ قىتاي حالىق ساياسي كەڭەسىنىڭ كوميتەتى (قحسكك) دەلەگاتسياسىمەن وتكەن كەزدەسۋدە سپۋتنيكتىك جەرۇستى ستانساسىن ورناتۋ جانە ورىن تاڭداۋ تۋرالى كەلىسىمگە قول قويىلدى.
قازۇۋ-دىڭ باسقارما مۇشەسى – عىلىمي-يننوۆاتسيالىق قىزمەت جونىندەگى پرورەكتورى مارعۇلان يبرايموۆ بىلتىر ءال-فارابي اتىنداعى قازاق ۇلتتىق ۋنيۆەرسيتەتى مەن قىتاي حالىق رەسپۋبليكاسىنىڭ سولتۇستىك-باتىس پوليتەحنيكالىق ۋنيۆەرسيتەتى ميكروسپۋتنيك ارقىلى عىلىمي زەرتتەۋلەر جۇرگىزۋ بويىنشا كەلىسىمگە قول قويىلعانىن اتاپ ءوتىپ, اتالعان كەلىسىم مەملەكەت باسشىسى قاسىم-جومارت توقاەۆ پەن قازاقستانعا رەسمي ساپارمەن كەلگەن قحر توراعاسى سي ءتسزينپيننىڭ بىرلەسكەن مالىمدەمەسىندە قول جەتكىزىلگەندىگىنە توقتالدى. قازىرگى كەزدە عالىمدار سبپۋ-داعى ارىپتەستەرمەن بىرلەسىپ قازاقستان مەن ورتالىق ازياداعى العاشقى ۋنيۆەرسيتەتتىك ميكروسپۋتنيك بولىپ تابىلاتىن NKSAT جوباسىن ازىرلەپ جاتىر.
جالپى قۇنى 3 ميلليون دوللاردى قۇرايتىن جوبا اياسىندا قازۇۋ اۋماعىندا حاينان سپۋتنيكتىك دەرەكتەر ورتالىعى جانە سبپۋ-مەن بىرلەسىپ جەرۇستى ستانتسياسىن ورناتۋ جوسپارلاعان. ستانسا ح-دياپازوندا جۇمىس ىستەپ, باسقا ەلدەردىڭ سپۋتنيكتەرىنەن دە سيگنال قابىلداپ, وڭدەۋگە مۇمكىندىك بەرەدى.
ءوز كەزەگىندە حاينان پروۆينتسياسى قحسكك توراعاسىنىڭ ورىنباسارى لي گوليان حاينان سپۋتنيكتىك دەرەكتەر ورتالىعىنىڭ جەرۇستى ستانساسىن قۇرۋ تاراپتار اراسىنداعى سەرىكتەستىكتىڭ جاڭا كەزەڭىنە جول اشاتىنىن اتاپ ءوتتى.
ءوزارا كەلىسىم نەگىزىندە قازۇۋ-داعى سولتۇستىك-باتىس پوليتەحنيكالىق ۋنيۆەرسيتەتىنىڭ فيليالى بازاسىندا جەرۇستى قابىلداۋ ستانساسىن ورناتۋ بويىنشا بىرلەسكەن جۇمىستار ىسكە اسادى. جوبا قازاقستانمەن شەكارالاس اۋماقتاردا سپۋتنيكتىك دەرەكتەردى تاراتۋ, الماسۋ جانە ءتيىمدى پايدالانۋ مۇمكىندىگىن ارتتىرۋعا باعىتتالىپ وتىر.
الماتى
