ەو جوسپارىنا سايكەس, سالىق سالىنۋى مۇمكىن ونىمدەردىڭ جالپى قۇنى 100 ملرد ەۋرونى قۇرايدى. بۇل اقش-تىڭ ەۋروپاعا جىل سايىن ەكسپورتتايتىن 335 ملرد ەۋرو كولەمىندەگى تاۋارلارىنىڭ ۇشتەن بىرىنە جۋىعى. سالىق ەنگىزىلۋى مۇمكىن نەگىزگى ونىمدەر قاتارىنا Boeing ۇشاقتارى, امەريكالىق اۆتوكولىكتەر مەن «بۋربون» ۆيسكيى كىرەدى.
ەۋرووداقتىڭ بۇل ارەكەتى اقش بيلىگىنىڭ 1 تامىزدان باستاپ ەو ەلدەرىنەن كەلەتىن تاۋارلارعا 30% باج سالىعىن ەنگىزۋى مۇمكىن دەگەن مالىمدەمەسىنە جاۋاپ رەتىندە قاراستىرىلىپ وتىر.
ساراپشىلاردىڭ پىكىرىنشە, ەگەر اقش تاريفتەردى راسىمەن ەنگىزسە, بۇل جاھاندىق ساۋدا قاتىناستارىنا كەرى اسەر ەتۋى مۇمكىن. سونىمەن قاتار ەو ەلدەرى 2023 جىلى قابىلدانعان ەكونوميكالىق قىسىمعا قارسى قۇرال (ACI) اياسىندا دا بىرقاتار جاۋاپ شارالارىن قولعا الۋى ىقتيمال. اتاپ ايتقاندا, اقش تەحنولوگيالىق كومپانيالارىنا سالىق سالۋ, امەريكالىق ينۆەستيتسيالارعا شەكتەۋ قويۋ جانە امەريكالىق كومپانيالاردىڭ ەۋرووداق نارىعىنا كىرۋىن شەكتەۋ قاراستىرىلىپ جاتىر.
دەگەنمەن ەو-عا مۇشە مەملەكەتتەردىڭ باسىم بولىگى اقش-پەن كەلىسسوزدەردى جالعاستىرۋدى, داعدارىستى بەيبىت جولمەن شەشۋدى قولدايدى.
ايتا كەتەيىك, بۇعان دەيىن اقش قازاقستاننان يمپورتتالاتىن كەيبىر تاۋارلارعا دا 25% باج سالىعىن ەنگىزگەن بولاتىن. الايدا ۇكىمەت بۇل شارا قازاقستان ەكسپورتىنىڭ 95%-ىنا اسەر ەتپەيتىنىن مالىمدەدى.
سونداي-اق 23 شىلدەدە اقش پەن جاپونيا جاڭا ساۋدا كەلىسىمىنە قول جەتكىزدى. كەلىسىم اياسىندا اقش جاپون تاۋارلارىنا 25%-دىڭ ورنىنا 15% تاريف ەنگىزسە, جاپونيا امەريكالىق ونىمدەرگە ءوز نارىعىن كەڭەيتۋدى جانە اقش ەكونوميكاسىنا 550 ملرد دوللار كولەمىندە ينۆەستيتسيا سالۋدى موينىنا الدى.
