فوتو: gov.kz
جيىندا ەسىرتكىگە قارسى كۇرەس پەن تۇرمىستىق زورلىق-زومبىلىقتىڭ الدىن الۋ, سانىن ازايتۋ ماسەلەسى دە تالقىلاندى.
ەندى رەسپۋبليكا بويىنشا ماسكۇنەمدىككە قارسى كۇرەس شەڭبەرىندە ىشىمدىكتەن باس تارتقان ەلدى مەكەندەردىڭ قوزعالىسى كەڭەيتىلەتىن بولادى. قازىرگى ۋاقىتتا ولاردىڭ سانى 400-دەن اسادى. وسىنداي باستامالاردى جۇزەگە اسىرىپ جۇرگەن بەلسەندىلەر مەن اكىمدىكتەردى دە ىنتالاندىرۋ ۇسىنىلدى. بۇگىندە كىسى ءولتىرۋدىڭ جارتىسىنان كوبى, ءاربىر ءۇشىنشى بۇزاقىلىق جانە ءتورتىنشى توناۋ قىلمىسى ماس كۇيدە جاسالادى.
ولجاس بەكتەنوۆ ەسىرتكى تارالۋىنىڭ سالدارىمەن عانا ەمەس, نەگىزگى سەبەپتەرىمەن دە كۇرەسۋگە باعىتتالعان جاڭا ەسىرتكى ساياساتىن ازىرلەۋدى تاپسىردى.
ۆەدومستۆوارالىق كوميسسيا وتباسىلىق-تۇرمىستىق قاتىناستار سالاسىنداعى قۇقىق بۇزۋشىلىقتاردىڭ الدىن الۋ جانە پسيحولوگيالىق كومەك كورسەتۋ, ونىڭ ىشىندە قۇقىق بۇزۋشىلارعا قارسى جۇرگىزىلىپ جاتقان جۇمىستاردىڭ تيىمدىلىگى ماسەلەلەرىن قارادى.
ءىىم مالىمەتىنشە, كەيىنگى ءۇش جىلدا تۇرمىستىق زورلىق-زومبىلىق فاكتىلەرى بويىنشا وتىنىشتەر سانى 35%-عا ازايعان. بۇل رەتتە 2025 جىلدىڭ باسىنان بەرگى وتكەن جىلدىڭ سايكەس كەزەڭىمەن سالىستىرعاندا 20%-عا تومەندەۋ بايقالعان. وتباسىلىق-تۇرمىستىق قىلمىستار سانى 34,9%-عا قىسقارعان.
پرەمەر-مينيستر وڭ ديناميكاعا قاراماستان, تۇرمىستىق زورلىق-زومبىلىقتىڭ الدىن الۋ ماسەلەسى ەلدىڭ وتباسىلىق-دەموگرافيالىق ساياساتىندا وزەكتى بولىپ قالىپ وتىرعانىن اتاپ ءوتتى.
«مەملەكەت باسشىسى ايقىنداعان «زاڭ مەن ءتارتىپ» قاعيداتى قوعامدا قانداي دا ءبىر زورلىق-زومبىلىققا, قول سۇعۋشىلىققا جول بەرىلمەيتىنىن بىلدىرەدى. مەملەكەت باسشىسىنىڭ تاپسىرماسى بويىنشا ءبىز زاڭنامانى كۇشەيتتىك. ايەلدەر مەن بالالارعا قاتىستى قۇقىققا قايشى ارەكەتتەر ءۇشىن جاۋاپكەرشىلىكتى قاتاڭداتتىق», دەدى ولجاس بەكتەنوۆ.
پرەمەر-مينيستر زورلىق-زومبىلىقتىڭ الدىن الۋ, ۆەدومستۆوارالىق ۇيلەستىرۋدى نىعايتۋ, حالىق اراسىندا اقپاراتتىق جۇمىستى كەڭەيتۋ جانە ۇكىمەتتىك ەمەس ۇيىمدارمەن ءوزارا ءىس-قيمىل جونىندەگى شارالار مەن پسيحولوگيالىق كومەك كورسەتۋ شارالارىن كۇشەيتۋ قاجەتتىگىنە نازار اۋداردى.
وتكەن جىلى ىشكى ىستەر مينيسترلىگىندە وتباسىلىق-تۇرمىستىق زورلىق-زومبىلىققا قارسى كۇرەس جونىندەگى مامانداندىرىلعان بولىمشە قۇرىلدى. اتالعان بولىمشە مۇددەلى مەملەكەتتىك ورگاندارمەن بىرلەسىپ وسى سالادا پروفيلاكتيكالىق جۇمىس جۇرگىزىپ جاتىر. قۇزىرەتتى قىزمەتتەردىڭ ءوزارا ءىس-قيمىلى دا ۇيىمداستىرىلدى.
تۇرمىستىق زورلىق-زومبىلىقتىڭ كۋاگەرى بولعان بالالار ماسەلەسى دە نازاردان تىس قالمادى. ءبىلىم مينيسترلىگىنە مۇنداي كۇيدەگى كامەلەتكە تولماعانداردى ەرتە انىقتاۋ جانە قولداۋ تەتىگىن ازىرلەۋ تاپسىرىلدى.
ولجاس بەكتەنوۆ وتباسىن قولداۋ ورتالىقتارى جەلىسىن دامىتۋدىڭ, ءتيىمدى تسيفرلاندىرۋدىڭ جانە بارلىق ۆەدومستۆولاردىڭ تۇرمىستىق قىلمىستارعا قارسى كۇرەستە كۇش-جىگەرىن بىرىكتىرۋدىڭ ماڭىزدىلىعىن اتاپ ءوتتى.
جيىن سوڭىندا پرەمەر-مينيستر جەرگىلىكتى اتقارۋشى ورگاندارعا راقىمشىلىققا ىلىككەن ازاماتتاردى كەشەندى بەيىمدەۋدى, سۇيەمەلدەۋدى جانە تۇرمىستىق زورلىق-زومبىلىقتى قوسا العاندا, ولاردىڭ قايتا قىلمىسقا بارۋىنىڭ الدىن الۋدى قامتاماسىز ەتۋدى تاپسىردى.
