ادىلەت – قوعام سەنىمىنىڭ وزەگى
ەلىمىزدە ادىلەت ۇعىمى الىستان سەرمەيتىن ابستراكتىلى تۇسىنىك ەمەس, قايتا ادامداردىڭ ومىرىنە تىكەلەي اسەر ەتەتىن قۇندىلىق رەتىندە قابىلدانادى. بۇل – تەك تەڭ مۇمكىندىكتەر تۋرالى تالاپ قانا ەمەس, قوعام مەن مەملەكەت اراسىنداعى سەنىمنىڭ نەگىزى.
قازاق قوعامىنداعى ادىلەتتىلىك ءبىلىم مەن مەديتسينالىق كومەككە تەڭ قولجەتىمدىلىك, ادال ەڭبەكتىڭ ءادىل باعالانۋى, قۇقىقتىڭ قورعالۋى, زاڭنىڭ بارىنە بىردەي قولدانىلۋى جانە ادامنىڭ تامىرىنا, تانىسىنا نەمەسە الەۋمەتتىك مارتەبەسىنە قاراماستان دامۋعا مۇمكىندىك الۋى سياقتى قاعيدالاردى قامتيدى. وسى ۇستانىمداردىڭ بۇزىلۋى – حالىق اراسىندا ادىلەتسىزدىك سەزىمىن تۋدىرادى. سەبەبى ادىلەتتىلىك – ازاماتتاردىڭ تابيعي ءارى ماڭىزدى قۇقىعى رەتىندە باعالانادى.
ادال ەڭبەك ەسكەرۋسىز قالماۋى ءتيىس – كوپشىلىكتىڭ پىكىرى
قسزي جۇرگىزگەن ساۋالناما ناتيجەسى بويىنشا, قازاقستاندىقتاردىڭ 98 پايىزدان استامى ادال ەڭبەكتەنەتىن ادامدار لايىقتى سىياقى الۋى كەرەك دەپ سانايدى. بۇل – ادىلەتتى ەڭبەككە دەگەن جوعارى قوعامدىق سۇرانىستى بىلدىرەدى. ادامدار تابىس جەكە كۇش-جىگەرگە بايلانىستى بولۋى ءتيىس دەپ ەسەپتەيدى.
الايدا بۇل پىكىرمەن كەلىسپەيتىن 1 پايىز رەسپوندەنت جۇيەلىك ادىلەتسىزدىكتى العا تارتادى. ولاردىڭ ويىنشا, كەيدە ەڭبەك ناتيجە بەرمەيدى, سەبەبى رەسۋرستارعا تەڭسىز قولجەتىمدىلىك پەن جەمقورلىق كەدەرگى بولادى. بۇل پىكىر ەڭبەك قۇندىلىعىنا قارسى كوزقاراس ەمەس, كەرىسىنشە – ادال ەڭبەكتىڭ ءتيىستى باعالانباي جاتقانىنا قوعام قۇرىلىمىنىڭ كىنالى ەكەندىگىن مەڭزەيتىن سىن.
ادىلەتتىلىك – بارلىق ازاماتقا ورتاق قۇندىلىق
قسزي زەرتتەۋى كورسەتكەندەي, ادىلەتتىلىككە ۇمتىلۋ – جاسى, تابىسى, ءبىلىمى ءارتۇرلى قازاقستاندىقتاردىڭ بارلىعىنا ءتان قاسيەت. بۇل – ادال ەڭبەك ەسكەرۋسىز قالماۋى كەرەك دەگەن يدەيانى اۋىلدا دا, قالادا دا, ءتۇرلى الەۋمەتتىك توپتار تەڭ دارەجەدە قولدايتىنىن بىلدىرەدى. وسىنداي ورتاق ۇستانىمدار ادىلەتتىلىكتىڭ جالپىۇلتتىق قۇندىلىققا اينالعانىن كورسەتەدى. ول – قوعامداعى ءارتۇرلى كوزقاراستاعى ادامداردى بىرىكتىرەتىن ورتاق كەلىسىم الاڭى. اسىرەسە بۇگىنگىدەي الەۋمەتتىك اركەلكىلىك كۇشەيىپ كەلە جاتقان كەزەڭدە بۇل قۇندىلىقتىڭ ورنى ەرەكشە.
قوعام وزگەرىپ جاتىر – جاڭا كوزقاراس قاجەت
قازىرگى تاڭدا قوعامدى جىنىسىنا, جاسىنا, تابىسىنا نەمەسە تۇرعىلىقتى جەرىنە قاراپ ساراپتاۋ جەتكىلىكسىز بولىپ بارادى. سەبەبى ۇقساس الەۋمەتتىك سيپاتتارعا يە ادامداردىڭ ءوزى – ءتىل, ءدىن, مادەني ورتا مەن اقپاراتتىق كەڭىستىككە بايلانىستى – مۇلدە ءارتۇرلى قۇندىلىقتار مەن مۇددەلەرگە يە بولۋى مۇمكىن. سوندىقتان ازاماتتاردىڭ كوڭىل-كۇيىن دۇرىس ۇعىنۋ ءۇشىن بۇرىنعى الەۋمەتتىك مودەلدەرگە عانا سۇيەنۋگە بولمايدى. ونىڭ ورنىنا ادامنىڭ ومىرلىك تاجىريبەسى, دۇنيەتانىمى, مادەني كودتارى مەن مەديا ورتاسى سياقتى زاماناۋي فاكتورلاردى ەسكەرۋ قاجەت. سەبەبى بۇگىنگى تاڭدا ادامنىڭ پىكىرلەرى مەن كۇتۋلەرىن ءدال وسى تەتىكتەر قالىپتاستىرىپ وتىر.
