فوتو: تەست ورتالىعى
ۇبت-عا تىركەلۋ ۇلتتىق تەستىلەۋ ورتالىعىنىڭ سايتى app.testcenter.kz ارقىلى تىركەلۋگە بولادى. ال تەستىلەۋدىڭ ءوزى 10-14 تامىز ارالىعىندا وتەدى.
عىلىم جانە جوعارى ءبىلىم مينيسترلىگىنىڭ مالىمەتىنشە, تامىزداعى ۇبت شەكتى بالل جيناي الماعان تالاپكەرلەردىڭ تەستىلەۋدەن قايتا ءوتىپ, جوو-عا اقىلى نەگىزدە تۇسۋگە مۇمكىندىك بەرۋ ءۇشىن وتكىزىلەدى. ءوتىنىش بەرۋ كەزىندە تەست تاپسىرۋشىلار ۇبت وتكىزىلەتىن ورىندى, كۇندى جانە ۋاقىتتى وزدەرى تاڭدايدى.
نەگىزگى ۇبت-عا قاتىسقان تالاپكەرلەر بەيىندىك پاندەر كومبيناتسياسىن تامىز تەستىلەۋىندە وزگەرتە الادى.
سونداي-اق, تامىز ايىنداعى ۇبت-عا بيىلعى, وتكەن جىلعى مەكتەپ جانە كوللەدج تۇلەكتەرى, قانداستار (قر ازاماتى بولىپ تابىلمايتىن ۇلتى قازاق ازاماتتار), شەتەلدە ءبىلىم العان ورتا ءبىلىم بەرۋ ۇيىمدارىنىڭ بىتىرۋشىلەرى, شىعارماشىلىق ماماندىقتاردان باسقا ماماندىقتارعا, باسقا ماماندىقتاردان پەداگوگيكالىق باعىتتارعا اۋىسقىسى كەلەتىن ستۋدەنتتەر جانە جوعارى وقۋ ورىندارىنا شارتتى تۇردە قابىلدانعان ستۋدەنتتەر قاتىسا الادى.
اتاپ وتسەك, جوو-دا اقىلى نەگىزدە ءوز ماماندىعى بويىنشا وقۋدى جالعاستىرۋدى جوسپارلاپ وتىرعان كوللەدج تۇلەكتەرى وقۋعا اڭگىمەلەسۋ قورىتىندىسى بويىنشا قابىلدانادى. بۇل رەتتە وقۋعا قابىلداۋدى جوو-لاردىڭ قابىلداۋ كوميسسيالارى جۇزەگە اسىرادى.
