تۇركىستان وبلىسىنىڭ ديقاندارىنا سۋ جەتكىزۋ ساپاسىن ارتتىرۋ باعىتىندا اۋقىمدى شارالار قولعا الىندى. اتاپ ايتقاندا, «قازسۋشار» رمك تۇركىستان فيليالى سىرداريا وزەنىنەن گنس-1 سورعى ستانتسياسىنا سۋ تارتاتىن «ماشينالىق ادىسپەن سۋ كوتەرۋ كانالىنىڭ» 2,6 شاقىرىمىن مەحانيكالىق جولمەن تازارتۋدى باستادى. بۇل جۇمىستار 25 شىلدەگە دەيىن اياقتالۋى ءتيىس.
فيليال مالىمەتىنشە, تازارتۋ جۇمىستارىنا مەكەمەنىڭ ءوز تەحنيكالارى جۇمىلدىرىلعان. كانال تولىق تازارتىلعان سوڭ, «دوستىق» كانالىنا قوسىمشا سەكۋندىنا 10 تەكشە مەتر سۋ جىبەرۋ مۇمكىندىگى ارتادى. بۇل ءوز كەزەگىندە تومەنگى اعىسىنداعى شارۋاشىلىقتاردى سۋمەن تۇراقتى قامتۋعا جول اشادى. سونىمەن قاتار, «قازسۋشار» بالانسىنداعى باسقا دا كانالدارداعى سۋ دەڭگەيىنىڭ كوتەرىلۋىنە ىقپال ەتەدى.
«جۇرگىزىلىپ جاتقان جۇمىستار كەلەسى جىلى دا «ماشكانالدىڭ» ۇزدىكسىز جۇمىس ىستەۋىنە مۇمكىندىك بەرەدى. بۇل ءادىس تەك جاز كەزىندە جۇزەگە اسادى, ويتكەنى باسقا مەزگىلدەردە كانال سۋعا تولى بولادى», دەدى «قازسۋشار» رمك تۇركىستان فيليالى ديرەكتورىنىڭ ورىنباسارى سەرىك تويتانوۆ.
ايتا كەتەيىك, بيىل ەلىمىزدىڭ وڭتۇستىگىندە سۋارۋ ماۋسىمى ادەتتەگىدەن 20 كۇن بۇرىن باستالدى. بۇعان سەبەپ – جاۋىن-شاشىننىڭ ازدىعى مەن جوعارى تەمپەراتۋرا. بۇگىندە تۇركىستان وبلىسىنداعى سۋارمالى ەگىستىكتەرگە كەزەكپەن سۋ بەرىلۋدە. جالپى ءوڭىردىڭ اۋىل شارۋاشىلىعىنا قاجەتتى سۋ كولەمى 2,82 ميلليارد تەكشە مەتردى قۇرايدى.
