كورمەدە حح عاسىردا قازاقستان بەينەلەۋ ونەرى مەكتەبىنىڭ قالىپتاسۋ كەزەڭىندە ەڭبەك ەتكەن ءار بۋىن وكىلدەرىنىڭ شىعارماشىلىعى توعىسىپ جاتىر. ولاردىڭ قاتارىندا مولداحمەت كەنباەۆ, نيكولاي حلۋدوۆ, حاكىمجان ناۋرىزباەۆ, ۆالەنتين انتوششەنكو-ولەنەۆ, ۆالەري كاپتەرەۆ, تاتيانا گلەبوۆا جانە ت.ب. بار.
قازاقستانعا XIX عاسىردىڭ سوڭىندا كەلگەن نيكولاي حلۋدوۆ شىعارماشىلىعىنىڭ XIX عاسىرداعى رەاليستىك كەسكىندەمە مەكتەبى قازاق جەرىندە كەڭىنەن تانىلىپ, جالعاسىن تابۋىنا ىقپالى زور بولدى. سۋرەتشى كوپ جەرگە ساياحاتتاپ بارعان, سونىڭ ناتيجەسىندە تۇرمىس پەن تابيعات كورىنىستەرىن بەينەلەيتىن كەسكىندەمەلىك تۋىندىلار جازدى.
ەلىمىزدىڭ بەينەلەۋ ونەرىندە قازاقستاننىڭ حالىق سۋرەتشىسى مولداحمەت كەنباەۆتىڭ شىعارماشىلىعى ەرەكشە ورىن الاتىنى بەلگىلى. ول – اكادەميالىق كوركەم ءبىلىم العان العاشقى قازاق سۋرەتشىلەرىنىڭ ءبىرى. ونىڭ تۋىندىلارى تەرەڭ مازمۇنىمەن جانە ۇلتتىق بولمىسىمەن ەرەكشەلەنەدى.
حاكىمجان ناۋرىزباەۆ – ۇلتتىق ءمۇسىن ونەرىنىڭ نەگىزىن قالاۋشى, قازاقستان رەسپۋبليكاسىنىڭ حالىق سۋرەتشىسى. ول مادەنيەت پەن ونەر قايراتكەرلەرىنىڭ پورترەتتەر گالەرەياسىن جاساپ, ەڭبەك ەرلەرىنىڭ كەلبەتىن قاعازعا ءتۇسىرىپ ۇلگەرگەن.
ۆالەنتين انتوششەنكو-ولەنەۆ – رەسپۋبليكاداعى اسا كورنەكتى گرافيك-سۋرەتشىلەردىڭ ءبىرى بولعان. ونىڭ شىعارماشىلىعى جانر, تاقىرىپ جانە كوڭىل كۇي تۇرعىسىنان الۋان ءتۇرلى. سۋرەتشىنىڭ سۇيىكتى تەحنيكاسى – اق-قارا لينوگراۆيۋرا. بۇل ءادىس ارقىلى ول ءتۇرلى تاقىرىپتاردى شەبەر بەينەلەگەن.
بۇل كورمە قىلقالام شەبەرلەرىنە كورسەتىلگەن قۇرمەت قانا ەمەس, سونىمەن قاتار ولاردىڭ كوزقاراسىمەن سول داۋىرگە ورالۋعا مۇمكىندىك بەردى. ولاردىڭ شىعارماشىلىق مۇراسى وشپەيدى, شابىت سىيلاپ, جۇرەكتى تەبىرەنتىپ, وتكەننىڭ ءۇنىن كەلەر ۇرپاققا جەتكىزەدى. ەڭ باستىسى, شەكسىز ۋاقىت پەن كەڭىستىكتەگى ادام بولمىسىن ەسكە تۇسىرەدى.
