سانجار ءادىلوۆ تەرگەۋشى ساراپتاما ناتيجەلەرىن الۋ ءۇشىن الماتىعا بارعانىن ايتتى.
«قازىر تەرگەۋ ارەكەتتەرى ءجۇرىپ جاتىر. ءبىز زارداپ شەككەندەردىڭ بارلىق دەرەكتەرىن تولىق تەكسەرەمىز. سۇراق-جاۋاپتار پوليتسيا دەپارتامەنتىندە وتكىزىلەدى. نەگىزگى كۇدىكتىدەن باسقا ەشكىم كۇدىكتى رەتىندە تانىلعان جوق», دەدى س. ءادىلوۆ.
بۇعان دەيىن ول بۇل ىستە جاڭا تۇلعالار پايدا بولۋى مۇمكىن ەكەنىن ايتقان ەدى.
ەسكە سالايىق, نۇراي سەرىكباي 11 قاڭتاردا شىمكەنتتە بىرنەشە پىشاق جاراقاتىنان قايتىس بولعان. الدىن الا دەرەكتەرگە سايكەس, كۇدىكتى ونى قورقىتىپ, ۇزدىكسىز ستالكينگ جاساعان. پرەزيدەنتتىڭ تاپسىرماسىمەن قۇقىق قورعاۋ ورگاندارىنىڭ ارەكەتىن تەكسەرۋ ءۇشىن شىمكەنت پوليتسيا دەپارتامەنتىنىڭ باسشىسى قىزمەتىنەن بوساتىلعان, ال باسقا قىزمەتكەرلەرگە نەمقۇرايدىلىق بويىنشا قىلمىستىق ءىس قوزعالعان.
ءساۋىر ايىندا پوليتسيا كۇدىكتىنىڭ پسيحيكالىق اۋىتقۋلارى بار ەكەنىن جانە اۋرۋحانادا جاتقانىن حابارلاعان. الايدا كەيىن ءىىم ونى اقىل-ەسى دۇرىس دەپ تانىعانىن مالىمدەدى.
