سەرىك جۇمانعاريننىڭ ايتۋىنشا, ەگەر بۇل كولەم وندىرىلگەندە, ءتورت ايداعى ءىجو-ءنىڭ ءوسىمى 3,6% ەمەس, 6%-دان جوعارى بولار ەدى.
«وسى ءتورت ايدا ءبىز شامامەن 5 ملن توننا مۇناي وندىرە المادىق. ەگەر وسى قوسىمشا مۇناي ەكونوميكاعا قۇيىلعاندا, ءوسىم 6 پايىزدان اسىپ كەتەر ەدى», دەدى ول.
سونىمەن قاتار ۆيتسە-پرەمەر قازاقستان ەكونوميكاسى مۇناي سەكتورىنسىز دا ءوسىم كورسەتە الاتىنىن اتاپ ءوتتى. ونىڭ ايتۋىنشا, وڭدەۋ ونەركاسىبى شامامەن 10%-عا وسسە, قۇرىلىس پەن ساۋدا سالالارى دا قارقىندى دامىپ كەلەدى.
سەرىك جۇمانعارين كاسىپكەرلىك سۋبەكتىلەرىنىڭ جابىلۋىنا قاتىستى ستاتيستيكاعا الاڭداماۋعا شاقىردى. ونىڭ مالىمەتىنشە, جابىلعان 99 مىڭ كاسىپكەرلىك سۋبەكتىسى ءىس جۇزىندە ەشقانداي قىزمەت جۇرگىزبەگەن. ال تاعى 13 مىڭ سۋبەكتىنىڭ قوسىمشا كومپانيالارى بولعاندىقتان, ولار جۇمىسىن جالعاستىرىپ جاتىر.
ايتا كەتەيىك, قاڭتار ايىندا تەڭىز كەن ورنىندا بولعان اپاتتىق جاعداي جانە كاسپي قۇبىر كونسورتسيۋمى جۇمىسىنا بايلانىستى قيىندىقتار قازاقستاننىڭ مۇناي ءوندىرۋ جوسپارىنا اسەر ەتتى. سونىڭ ناتيجەسىندە 2026 جىلعا ارنالعان مۇناي ءوندىرۋ كولەمى 100,5 ملن توننادان 96-98 ملن تونناعا دەيىن تومەندەگەن بولاتىن.
نۇربولات امانبەك
