فوتو: azh.kz
بيىل پايدالى قازبالار رەسۋرسىن ىزدەۋگە ۇكىمەت 30 ملرد تەڭگە باعىتتايدى.
«جەر قويناۋىن گەولوگيالىق بارلاۋ كولەمىن ارتتىرۋ ءۇشىن بيىلدان باستاپ قارجىلاندىرۋ كولەمىن ەداۋىر ۇلعايتامىز. ءبىز جەر قويناۋىن پايدالانۋ قۇقىقتارىن بەرۋ بويىنشا اۋكتسيونداردان تۇسەتىن بونۋستاردىڭ قاراجاتتارىن گەولوگيانى دامىتۋعا باعىتتاۋ تۋرالى شەشىم قابىلدادىق. بيىل بۇل سوما كەمىندە 30 ملرد تەڭگەنى قۇرايدى. اتالعان قارجى كولەمى ءالى دە ارتا تۇسەتىن بولادى. قازىرگى ۋاقىتتا ءتيىستى ەسەپتەۋلەر ءجۇرىپ جاتىر», دەدى ولجاس بەكتەنوۆ.
سونداي-اق پرەمەر - مينيستر ونەركاسىپتىك قۋاتتاردى جاڭارتۋ ماسەلەسىنە دە توقتالىپ, تاۋ-كەن مەتاللۋرگيا كەشەنىنىڭ باسىمدىقتارىن بەلگىلەپ بەردى.
«مەتاللۋرگتەر مەن كەنشىلەردىڭ ەڭبەك قاۋىپسىزدىگىن كۇشەيتۋ باعىتىندا اۋقىمدى جۇمىستار اتقارىلىپ جاتىر. ونەركاسىپ, ەكولوگيا, توتەنشە جاعدايلار مينيسترلىكتەرى ءىرى تاۋ-كەن مەتاللۋرگيا كاسىپورىندارىمەن بىرلەسىپ, قولدانىستاعى وندىرىستەردى جاڭعىرتۋدى, جاڭا تەحنولوگيالاردى ەنگىزۋدى جانە ەڭبەك قاۋىپسىزدىگى دەڭگەيىن ارتتىرۋدى قامتاماسىز ەتۋى قاجەت», دەدى ۇكىمەت باسشىسى.
