فوتو: اشىق دەرەككوز
سۆەتلانا جاقىپوۆانىڭ ايتۋىنشا, ىشكى ەڭبەك ۇتقىرلىعى باعىتىندا دا ىسكەرلىك بەلسەندىلىك ارتىپ كەلەدى. ماسەلەن, 2022 جىلدان بەرى ەرىكتى قونىس اۋدارۋ باعدارلاماسى اياسىندا 28 مىڭعا جۋىق ازامات ەل ىشىندە قونىس اۋدارعان. بۇل ءوز كەزەگىندە قونىس اۋدارۋشى وڭىرلەردەگى تەرىس كوشى-قون سالدوسىن ءتورت ەسەگە ازايتۋعا مۇمكىندىك بەرگەن.
«اعىمداعى كەزەڭدە قونىس اۋدارۋشىلار مەن قانداستاردى بەيىمدەۋ جانە ينتەگراتسيالاۋ بويىنشا قابىلدانعان شارالار ولاردىڭ سولتۇستىك وڭىرلەردەن نولدىك مانگە كەتۋ دەڭگەيىن تومەندەتۋگە ىقپال ەتتى», دەدى مينيستر.
سونداي-اق, مينيستر 2030 جىلعا دەيىن كوشى-قون جانە دەموگرافيالىق ساياساتتى دامىتۋعا ارنالعان جاڭا ستراتەگيالىق قۇجات ازىرلەنىپ جاتقانىن جەتكىزدى.
قۇجات اياسىندا ەڭبەك كوشى-قونىن باسقارۋدىڭ تسيفرلىق تەتىكتەرى ىسكە قوسىلادى. بۇل ءۇشىن قازاقستاندا ەڭبەك كوشى-قونى بويىنشا بىرىڭعاي تسيفرلىق پلاتفورما ەنگىزىلمەك. پلاتفورما ارقىلى بىلىكتى ميگرانتتاردى ىرىكتەۋ, تىركەۋ جانە بەيىمدەۋ ۇدەرىستەرى اۆتوماتتاندىرىلادى.
جاڭا قۇجاتتا:
- زاڭسىز جۇمىسپەن قامتۋ مەن كولەڭكەلى ەكونوميكاعا قارسى شارالاردى كۇشەيتۋ;
- شەتەلدىك جۇمىس كۇشىنىڭ ەڭبەك قۇقىقتارىن قورعاۋ;
- تاپشى سالالار بويىنشا كۆوتا جۇيەسىن قايتا قاراۋ;
- ۇيىمداستىرىلعان كوشى-قون ارنالارىنىڭ اياسىن كەڭەيتۋ قاراستىرىلادى.
ىشكى ەڭبەك كوشى-قونىن جانداندىرۋ ءۇشىن كەشەندى ءتاسىل ەنگىزىلەدى. الدىمەن قاجەتتى ينفراقۇرىلىم قۇرىلىپ, سودان كەيىن عانا تۇرعىنداردى كوشىرۋ جۇزەگە اسىرىلادى. سونىمەن قاتار, جۇمىسپەن قامتۋ ورتالىقتارى ارقىلى جۇمىس كۇشى تاپشىلىعى بار وڭىرلەرگە تارتۋ ماقساتىندا جاڭا موتيۆاتسيالىق قۇرالدار ەنگىزۋ جوسپارلانعان.
