سۋرەتتەردى تۇسىرگەن – جەڭىس ىسقاباي
يندۋستريالىق ايماقتا ورنالاسقان جاڭا زاۋىتتىڭ اشىلۋ سالتاناتىندا جەتىسۋ وبلىسى اكىمىنىڭ ورىنباسارى اسەت قاناعاتوۆ ءسوز سويلەپ, زاۋىت ۇجىمىن جانە جينالعانداردى تاريحي ساتپەن قۇتتىقتادى.
«جەتىسۋ وبلىسى قۇرىلعاننان بەرى ونەركاسىپتىك ءوندىرىستىڭ كولەمى جىل سايىن ارتىپ كەلەدى. ماسەلەن, كەيىنگى ءۇش جىلدا بۇل كورسەتكىش 16,8%-عا ءوسىپ, 347 ملرد تەڭگەگە جەتتى. جالپى, وڭىردە وسى ۋاقىت ىشىندە 85 ملرد تەڭگەگە 35 جوبا جۇزەگە استى. ونىڭ ىشىندە جەل جانە سۋ ەلەكتر ستانسالارى, اككۋمۋلياتور مەن كۇن پانەلدەرىن شىعاراتىن زاۋىتتار بار. قۇرىلىس قارقىنى جوعارى جەتىسۋدا وسىنداي ءوندىرىس ورىندارىنىڭ اشىلۋى – ۋاقىت تالابى. سەبەبى وڭىردە الەۋمەتتىك نىساندار مەن تۇرعىن ۇيلەر جاپپاي سالىنىپ جاتىر. جاڭا زاۋىت جەرگىلىكتى قۇرىلىس سالاسىن ساپالى, قولجەتىمدى ماتەريالمەن قامتاماسىز ەتىپ قانا قويماي, شەتەلدىك ونىمدەرگە تاۋەلدىلىكتى دە ازايتادى», دەدى وبلىس اكىمىنىڭ ورىنباسارى.
«ستالبەتون» جشس-نىڭ بۇل باستاماسى – ەل ەكونوميكاسىن ءارتاراپتاندىرۋ باعىتىنداعى ناقتى قادامداردىڭ ءبىرى. كاسىپورىن ديرەكتورى قالقاباي مۇسانوۆ وسى ماڭىزدى ىسكە اتسالىسقان بارلىق مامانعا العىس ءبىلدىرىپ, ۇجىمدى جاڭا بەلەستەرگە شاقىردى. ونىڭ ايتۋىنشا, زاۋىتتىڭ ىسكە قوسىلۋى – ۇلكەن ەڭبەكتىڭ, جۇيەلى جۇمىستىڭ, جاۋاپتى كوزقاراستىڭ ناتيجەسى.
«وڭىردە وڭدەۋشى ونەركاسىپ, اۋىل شارۋاشىلىعى جانە قۇرىلىس سالالارى قارقىندى دامىپ كەلەدى. وسى باعىتتاردا باستالعان تىڭ جوبالار ءوڭىردىڭ بولاشاقتاعى ەكونوميكالىق تىرەگىنە اينالماق. جاڭا ءوندىرىس ورداسىنىڭ اشىلۋى تەك ەكونوميكالىق جاڭالىق ەمەس, بۇل – ءوڭىر تۇرعىندارى ءۇشىن ۇلكەن ءۇمىت, جاس ماماندار ءۇشىن مۇمكىندىك, ال جەتىسۋدىڭ بولاشاعى ءۇشىن جارقىن جولدىڭ باستاۋى», دەيدى ق.مۇسانوۆ.
جاڭا زاۋىت – تەك قۇرىلىس يندۋسترياسىنا ەمەس, جالپى وبلىستىڭ الەۋمەتتىك-ەكونوميكالىق دامۋىنا وڭ سەرپىن بەرەتىن باستاما. بىرىنشىدەن, جەرگىلىكتى حالىققا جۇمىس ورنى اشىلادى. ەكىنشىدەن, ايماقتاعى قۇرىلىس كومپانيالارى ساپالى وتاندىق ونىمگە قول جەتكىزەدى. ۇشىنشىدەن, ءوندىرىس يمپورتتى الماستىرۋ ساياساتىنا ناقتى ۇلەس قوسادى. كاسىپورىننىڭ وندىرىستىك ديرەكتورى داۋرەن نۇرالى زاۋىتتىڭ جۇمىسى مەن ارتىقشىلىقتارى جونىندە ايتىپ ءوتتى.
«بىزدە شىعارىلاتىن اۆتوكلاۆتى قاتايتىلعان گازدالعان بەتون كىرپىشتەر زاماناۋي تالاپتارعا ساي. ولار قىتاي تەحنولوگياسى بويىنشا وندىرىلەدى, ال جابدىقتار حالىقارالىق ستاندارتتارعا جاۋاپ بەرەدى. جەرگىلىكتى ماماندار ارنايى وقۋدان ءوتىپ, زاماناۋي تەحنولوگيامەن جۇمىس ىستەۋگە بەيىمدەلدى. ءبىزدىڭ ءونىمنىڭ باستى ارتىقشىلىعى – جىلۋ ساقتاۋ قابىلەتىنىڭ جوعارى بولۋى. قىستىڭ قاقاعان سۋىعىندا – ءۇيدى جىلى ۇستاسا, جازدىڭ اپتابىندا – سالقىندىقتى ساقتايدى», دەدى داۋرەن نۇرالى.
زاۋىتتىڭ تەگىن جاتاقحاناسى بار. قىزمەتكەرلەر كۇنىنە ءۇش رەت ىستىق تاماقپەن قامتىلادى. جۇمىسقا ورنالاستىرىلعان ماماندار اراسىندا اقسۋ اۋدانىنان كەلگەن جاس وتباسى دا بار.
«زاۋىتقا ءبىرىنشى بولىپ ءوزىم, سودان كەيىن جۇبايىم ورنالاستى. مەنىڭ ماماندىعىم تاربيەشى, كۇيەۋىم ءىت سالاسىنىڭ مامانى. وتاسقانىمىزعا 8 جىل بولدى, ءۇش بالامىز بار. زاۋىتتا ارنايى دايىندىقتان ءوتتىم, قازىر تابىستى جۇمىس ىستەپ كەلەمىن. جۇمىس كەستەسى جاس وتباسىمىز ءۇشىن قولايلى, جالاقىمىز تۇراقتى», دەيدى مينار دۇيسەبەك.
جەتىسۋ وبلىسى
