فوتو: بەيبارىس انۋار, kaz.inform.kz
ۇيىمداستىرۋشىلاردىڭ مالىمەتىنشە, 40 مىڭنان استام ەلوردا تۇرعىنى مەن قالا قوناعى ەلدىڭ تۇكپىر-تۇكپىرىنەن اكەلىنگەن 30 توننادان استام ۇلتتىق سۋسىننان ءدام تاتقان. فەستيۆالدە باق سىناعان قىمىز وندىرۋشىلەردىڭ ارقايسىسى 500 ليتردەن استام قىمىز اكەلىپ, ەتنو-مادەني جوباعا قوناقتارىنا ۇلتتىق سۋسىندى دايىنداۋدىڭ بىرەگەي تەحنولوگياسىمەن دە تانىستىردى. ەل اراسىندا داڭقى جايىلعان گاستروفەستيۆالدە سارجال اۋىلىنىڭ «جانىس» شارۋا قوجالىعىنا باس بايگەنى ەنشىلەپ, 20 ميلليون (20 000 000) تەڭگە سىياقىعا يە بولدى. ال ەكىنشى ورىندى قارقارالىنىڭ «قارىنشي» شارۋاقوجالىعى يەلەنسە, ءۇشىنشى ورىندى «قىمىزىناي» قىمىزى ۇتىپ الدى.
اباي وبلىسىنىڭ اكىمى بەرىك ءۋالي سارجال اۋىلىن ايتۋلى جەڭىسىمەن قۇتتىقتاپ, ىقىلاس-تىلەگىن ءبىلدىردى.
«بۇل – ءوڭىرىمىز ءۇشىن ۇلكەن مارتەبە ءارى ادىلەتتى جەڭىس! سەبەبى سارجالدىڭ سارى قىمىزى – كوپتەن بەرى ەل اۋزىندا جۇرگەن, تالاي جۇرتتىڭ تاڭدايىن قاقتىرعان تابيعي ءونىم. بىراق بۇگىنگى جەڭىس تەك ءدام ارقىلى ەمەس, ءادىل دە اشىق داۋىس بەرۋ ناتيجەسىندە انىقتالدى. دەمەك بۇل – حالىقتىڭ ءوزى بەرگەن ءادىل باعا!», دەيدى ايماق اكىمى.
سونىمەن قاتار وبلىس باسشىسى بۇل جەڭىستىڭ الدا ىشكى ءتۋريزمدى دامىتىپ, ۇلتتىق ونىمدەردى وڭىرلىك برەند رەتىندە تانىلۋعا جاڭا سەرپىن بەرەدى دەگەن ويدا.
«BaiQymyz» جوباسىنىڭ ماقساتى – قىمىز ءىشۋ مادەنيەتىن جاڭعىرتۋعا, فەرمەرلىكتى, اۋىل شارۋاشىلىعىن دامىتۋعا جانە جەرگىلىكتى برەندتەردى تانىمال ەتۋگە باعىتتاۋ. جيىنعا كەلۋشىلەر قىمىزدان ءدام تاتىپ قويماي, فولكلورلىق ونەردى تاماشالاپ, قولونەر جارمەڭكەسىن ارالاپ, كونتسەرتتەر مەن جىلقى كورمەسىنە قاتىستى. ال ۇلى ابايدىڭ 180 جىلدىعىندا سارجالدىقتاردىڭ جەڭىسى قۋانىشتى ەسەلەي ءتۇستى. وسى تۇستا سارجال قىمىزى تانىمال ساۋدا بەلگىسىنە اينالىپ, الەمدىك برەند بولۋعا ءتيىس.
اباي وبلىسى
