فوتو. اشىق دەرەككوز
ء«بىز بالالارعا ىڭعايلى Baby Grok قوسىمشاسىن جاساۋدى قولعا الامىز», دەدى ميللياردەر قىسقا عانا جازباسىندا.
الايدا ماسك بۇل جوبانىڭ ناقتى قانداي ماقساتتا جاسالاتىنى, بالالارعا قالاي كومەكتەسەتىنى جانە قاشان ىسكە قوسىلاتىنى جونىندە قوسىمشا مالىمەت بەرگەن جوق. قازىرشە Baby Grok تۋرالى بەلگىلىسى – ونىڭ اتاۋى عانا.
يلون ماسكقا تيەسىلى xAI كومپانياسى جۋىردا عانا Grok 4 اتتى جاساندى ينتەللەكت چات-بوتىن ىسكە قوسقان ەدى. بۇعان دەيىنگى نۇسقالارى بىرنەشە اي بۇرىن عانا جاريالانعان. وسىدان-اق كومپانيانىڭ جي تەحنولوگياسىن دامىتۋدى اسا جوعارى قارقىنمەن جۇرگىزىپ جاتقانىن بايقاۋعا بولادى.
ايتا كەتەيىك, Grok چات-بوتى X پلاتفورماسىمەن تىعىز ىقپالداستىقتا جۇمىس ىستەيدى. الايدا Bloomberg اگەنتتىگىنىڭ حابارلاۋىنشا, وسى بوت ارقىلى انتيسەميتتىك سيپاتتاعى كەيبىر جازبالار جاريالانعان. بۇل جاعداي قوعامدا سىن تۋعىزىپ, كومپانيانىڭ يميدجىنە تەرىس اسەر ەتكەن.
دەگەنمەن, يلون ماسكتىڭ جاڭا باستاماسى – Baby Grok – بالالار مەن جاسوسپىرىمدەرگە ارنالعان قاۋىپسىز, بەيىمدەلگەن جاساندى ينتەللەكت قۇرالى رەتىندە جاسالۋى مۇمكىن. ازىرگە ناقتى مالىمەتتەر از بولعانىمەن, بۇل جوبا جي سالاسىنداعى قىزىقتى ءارى تىڭ باعىتتاردىڭ ءبىرى بولارى انىق.
