قازاقستان مەن قىتايدىڭ تۋريزم يندۋسترياسى وكىلدەرى اراسىنداعى ءوزارا ءتيىمدى ىنتىماقتاستىقتى نىعايتۋعا ارنالعان فورۋمعا ەكى ەلدىڭ جەتەكشى ساراپشىلارى, تۋروپەراتورلارى, قوناقۇي بيزنەسى مەن «Ctrip», «Tongcheng», «JD Travel» ءتارىزدى ءىرى تەحنولوگيالىق كومپانيالارىنىڭ وكىلدەرى قاتىستى. باسقوسۋ اياسىندا «Kazakh Tourism» مەن «Zowoyoo» كومپانيالارى ىنتىماقتاستىق تۋرالى مەموراندۋمعا قول قويدى. قۇجات ەلىمىزدىڭ تۋريستىك الەۋەتىن قىتاي نارىعىندا تسيفرلىق فورماتتا دارىپتەۋگە, قىتايدان تۋريستەردى بەلسەندى تارتۋعا باعىتتالعان.
تاراپتار الداعى ۋاقىتتا ساياحاتشىلارعا بەيىمدەلگەن زاماناۋي تسيفرلىق ەكوجۇيەنى دامىتادى. سەرىكتەستىك اياسىندا ەلىمىزدىڭ قىتايداعى «Douyin» (TikTok-تىڭ بالاماسى), «Xiaohongshu» (Little Red Book) ءتارىزدى تانىمال پلاتفورمالاردا, باسقا مەدياارنالاردا ۇسىنىلۋىن كەڭەيتۋ قاراستىرىلعان.
«Zowoyoo» قىتاي قولدانۋشىلارىنىڭ تسيفرلىق مىنەز-قۇلقىن جاقسى تۇسىنەدى. بۇل بىزگە جاڭا بۋىن تۋريستەرىنىڭ تالعامى قالىپتاساتىن نەگىزگى پلاتفورمالاردا بارىنشا جەكە ستراتەگيا قۇرۋعا مۇمكىندىك بەرەدى. وسىلايشا, ءبىز ءاربىر ساياحاتشىعا بەيىمدەلگەن تاجىريبە ۇسىنىپ, ولاردىڭ ساپاردى جوسپارلاۋىن ەداۋىر جەڭىلدەتەمىز», دەپ اتاپ ءوتتى «Kazakh Tourism» ۇك» اق باسقارما توراعاسىنىڭ ورىنباسارى دانيەل سەرجان ۇلى.
قىتاي دەلەگاتسياسىنا ەلىمىزدىڭ تۋريستىك الەۋەتى تانىستىرىلىپ, تۋريزم سالاسىنداعى ىنتىماقتاستىقتى كەڭەيتۋ مۇمكىندىكتەرى تالقىلاندى. پانەلدىك سەسسيالار بارىسىندا ەكى نەگىزگى تاقىرىپ: تۋريزم ەكوجۇيەسىنىڭ تسيفرلىق ترانسفورماتسياسى, زاماناۋي مەديالار ارقىلى ماركەتينگتىك ىلگەرىلەتۋ كوتەرىلدى.
فورۋم ەكى ەل اراسىنداعى تۋريزم مەن مادەني بايلانىستاردى دامىتۋعا ارنالعان ماڭىزدى ديالوگ الاڭىنا اينالدى.
