«بيىل ءبىز «تورايعىر-6» اتتى بەلگىلى ەسكەرتكىشتە قازبا جۇمىستارىن جۇرگىزىپ, تاس توبەنىڭ شىڭىن زەرتتەدىك. ناتيجەسىندە «تورايعىر-7» جاڭا قورعان انىقتالدى. ەكى قورعاندى قازۋ بارىسىندا ءبىز ساق ءداۋىرىنىڭ ەرتە كەزەڭىنە جاتاتىن قولا پىشاقتاردى تاپتىق», – دەدى مارعۇلان ۋنيۆەرسيتەتىنىڭ ارحەولوگيالىق قورلارىنىڭ باس ساقتاۋشىسى ەلەنا تۋشەۆا.
زەرتتەۋشىلەردىڭ ايتۋىنشا, بۇل - پاۆلودار وبلىسىندا تابىلعان ەڭ كونە قولا بۇيىمداردىڭ ءبىرى.
«پىشاقتار ەجەلگى تەحنولوگيا ءادىسى ارقىلى قولادان قۇيىلعان. بىراق ستيليستيكالىق جاعىنان ەرتە تەمىر داۋىرىنە جاتادى. بۇل ايماقتا دامىعان مەتاللۋرگيالىق تەحنولوگيالار مەن تۇراقتى مادەني بايلانىستاردىڭ بولعانىن راستايدى», – دەدى ەلەنا تۋشەۆا.
سونداي-اق ارحەولوگتار بۇل جەردەن تاسمولا مادەنيەتى وكىلدەرىنىڭ قالدىقتارىن تاپقان.
«قاڭقا-سۇيەكتەر جاقسى ساقتالعان. بۇل جىنىس, جاس جانە انتروپولوگيالىق سيپاتتامالاردى انىقتاۋعا مۇمكىندىك بەردى. ال تومەنگى قاباتتى تازارتقان كەزدە ءبىز كونە اندرونوۆ مادەنيەتىنە جاتاتىن قابىرلەرگە تاپ بولدىق», – دەدى «تاريح» باعدارلاماسىنىڭ ستۋدەنتى انگەلينا گريششەنكو.
ايتا كەتەيىك, مارعۇلان ۋنيۆەرسيتەتى باياناۋىل ايماعىندا 10 جىلدان استام ۋاقىت بويى زەرتتەۋلەر جۇرگىزىپ كەلەدى. بۇگىندە وقۋ ورداسى باياناۋىلداعى نەگىزگى ارحەولوگيالىق ەسكەرتكىشتەردىڭ ساقتالۋىن قامتاماسىز ەتەدى.
