ءمينيستردىڭ ايتۋىنشا, قاپلانبەك, اتامەكەن, كولجات جانە الاكول وتكىزۋ بەكەتتەرى جاڭارتىلىپ, قولدانىسقا بەرىلگەن. ال قالعان بەس پۋنكت – قازىعۇرت, تاجەن, تەمىر بابا, مايقاپشاعاي جانە باقتى جىل سوڭىنا دەيىن كەزەڭ-كەزەڭىمەن ىسكە قوسىلادى. وسىلايشا, قازاقستاننىڭ سىرتقى شەكاراسىنداعى بارلىق اۆتوموبيل بەكەتتەرى تولىق جاڭعىرتۋدان وتەدى.
وتكىزۋ جىلدام, باقىلاۋ ناقتى
جاڭعىرتۋ ناتيجەسىندە پۋنكتەردىڭ وتكىزۋ قابىلەتى ورتا ەسەپپەن 25%-عا, ال قىتايمەن شەكارادا 37%-عا ارتقان. بۇعان دەيىن 9 ساعاتقا دەيىن سوزىلاتىن شەكارادان ءوتۋ ۋاقىتى قازىر 3 ساعاتقا دەيىن قىسقارعان.
«بۇل ينفراقۇرىلىمدى جاڭارتۋدىڭ عانا ەمەس, تسيفرلىق شەشىمدەردىڭ دە جەمىسى», دەدى ءمادي تاكيەۆ. ونىڭ ايتۋىنشا, CargoRuqsat ەلەكتروندى كەزەك جۇيەسى ىسكە قوسىلىپ, 55 مىڭ جۇرگىزۋشى مەن 145 مىڭ كولىك قۇرالى تىركەلگەن. بۇل جوبا ادام فاكتورىن ازايتىپ, ءوتۋ راسىمدەرىن اشىق ءارى ءادىل ەتۋدى كوزدەيدى.
بىرىڭعاي تسيفرلىق باقىلاۋ جۇيەسى
جاڭعىرتۋ جۇمىستارى تولىق اياقتالعاننان كەيىن بارلىق وتكىزۋ بەكەتتەرى سىرتقى شەكارانى باسقارۋدىڭ بىرىڭعاي تسيفرلىق جۇيەسىنە بىرىكتىرىلەدى. بۇل تەك ساۋدا لوگيستيكاسىن جەڭىلدەتىپ قويماي, شەكارا قاۋىپسىزدىگىن دە ارتتىرا تۇسپەك. بيزنەس پەن ازاماتتار ءۇشىن جىلدام, قاۋىپسىز جانە اشىق ءوتۋدىڭ جاڭا ۇلگىسى قالىپتاسادى.
