انىعىندا, روماندا وتپەلى شاقتاعى اۋىل ادامدارىنىڭ باسىنان وتكەن قيىندىقتار باياندالعان. ونداعى كەيىپكەرلەر بەينەسى دە تانىس جاندارداي جىلى اسەر قالدىردى. ويتكەنى ءبىزدىڭ وقۋشى كەزىمىز 90-جىلدارداعى وسى ۋاقىتپەن تۇسپا-تۇس كەلىپ, اۋىلداعى قيىنشىلىقتى كوردىك. سونىڭ بارلىعى شىعارمانى وقىعاندا كوز الدىمىزدا كينو تاسپاسىنداي تىزبەكتەلىپ ءوتىپ جاتتى.
روماندا تۋعان جەرىنىڭ اياق استىنان ەشكىمگە قاجەتسىز بولىپ قالعانى اۋىلداعى سانالى جاستاردىڭ اشۋ-ىزاسىن تۋدىردى. سودان كەيىن ولار قارسى ارەكەتكە كوشەدى. شىعارمانىڭ ءون بويىندا ون ءۇش قىزدىڭ جوقتان بار جاساۋعا ۇمتىلىسىن اۆتور وتە نانىمدى سۋرەتتەيدى. وقىرماندى مەيلىنشە سەندىرەدى. تۋىندىداعى باس كەيىپكەردىڭ ءبىرى – بيعايشا ساقتاپبەرگەنقىزى. اۋىل جۇرتىنىڭ جان-جاققا كوشىپ, تۋعان جەرىنىڭ كوز الدىندا توزىپ بارا جاتقانىنا جانى كۇيزەلگەن بويجەتكەن باقىتتى بالالىق شاعى وتكەن مەكەندى تاستاپ كەتە المايدى. اقىرى ءوزى سياقتى ون ەكى قۇربىسىمەن بىرگە اقىل قوسىپ, ءوز كۇشتەرىمەن بەلسەنە ىسكە كىرىسەدى. باس-اياعى جىلعا جەتپەيتىن ۋاقىتتا اۋىل ەڭسەسىن قايتا تىكتەيدى. قىسقاسى, روماندا ون ءۇش قىزدىڭ ەرلىكپەن پارا-پار ەڭبەگى ايشىقتى كوركەمدەلگەن.
وسى كىتاپقا جازعان العى سوزىندە بەلگىلى جازۋشى, مەملەكەتتىك سىيلىقتىڭ لاۋرەاتى تۇرىسبەك ساۋكەتاي اۋىلدىڭ كۇيرەۋى حالقىمىز ءۇشىن ۇلكەن رۋحاني اپات ەكەنىن قالامگەر جانى اۋىرىپ جازعانىن اتاپ كورسەتكەن.
«ۋاقىتپەن ەسەپتەسپەي, كۇندىز-ءتۇنى بىلەكتى سىبانىپ جۇمىسقا كىرىسكەن ون ءۇش قىزدىڭ حيكاياتى كۇللى وبلىس كولەمىنە تاراپ, كوپشىلىكتىڭ ريزاشىلىعىنا, قولداۋىنا بولەنەدى. باياعىداي تۋعان اۋىلدىڭ ءتۇتىنى تىك ۇشىپ, ايدىڭ كولگە اققۋ ورالاتىنداي, تىرشىلىك دۋمانى بەينەبىر ەرتەگىدەي ورنىعا باستايدى. جازۋشى ەرلىككە لايىق ەڭبەگىمەن ەل تىرەگى بولۋعا ۇمتىلعان وسىناۋ جاستاردىڭ جاسامپازدىق عيبراتىن وسكەلەڭ ۇرپاققا ۇلگى ەتىپ كورسەتۋدى ماقسات تۇتقان. شىنتۋايتىنا كەلگەندە, بۇل شىعارما ورنەكتى وركەندى ءارى سونى دۇنيە ەكەنىن اشىپ ايتۋمىز كەرەك», دەپ لايىقتى باعا بەرگەن.
سونداي-اق بۇل كىتاپقا اۆتوردىڭ ات باپتاۋدىڭ قىر-سىرىن اڭگىمەلەگەن ء«ابۋدىڭ قوس كۇرەڭى» حيكاياتى مەن جۇماباي قارتقوجاق بالاسىنىڭ باسىنان وتكەن ءومىرىنىڭ شىم-شىتىرىق وقيعاسىن ارقاۋ ەتكەن «قارت چەكيستىڭ اڭگىمەسى» اتتى شىعارماسى ەنگەن. جاقىندا قالامگەر رەداكتسياعا باس سۇققان ەدى. سوندا تاعى ءبىر كولەمدى دۇنيە باستاعانىن ايتتى.
