بۇگىنگى كۇنى قوناەۆتا 8 قالالىق جاعاجاي بار. بىلتىر №5 جاعاجاي بيۋدجەت ەسەبىنەن, ال بيىل ونىڭ توڭىرەگىندەگى 1 شاقىرىم جاعاجاي ينۆەستور ەسەبىنەن اباتتاندىرىلىپ, قولدانىسقا بەرىلگەن.
«جاعاجايدىڭ جاڭا كەيىپكە ەنۋى تۋريستىك تارتىمدىلىقتى ارتتىردى. مىسالى, بىلتىر قالامىزعا 1,5 ملن دەمالۋشى كەلسە, بيىل ونىڭ سانى شومىلۋ ماۋسىمى اياقتالماي-اق 860 مىڭنان اسىپ كەتتى. ورتا ەسەپپەن العاندا №5 جاعاجايعا كۇندەلىكتى 1500-2000, دەمالىس كۇندەرى 4500-6000 ادام كەلەدى. بۇل وتە جاقسى كورسەتكىش», دەدى اكىم.
شاھار باسشىسىنىڭ سوزىنشە, 7 جاعاجاي №5 جاعالاۋدىڭ ستيلىنە سايكەستىندىرىلىپ جاسالادى. ياعني, جوبادا ينفراقۇرىلىم, سانيتارلىق ايماقتار, جاسىل ايماقتار, شاعىن ساۋلەتتىك نىساندار, كومپوزيتسيالار, دەمالىس ورىندارى مەن فۋدكورتتار, قاۋىپسىزدىك شارالارى قاراستىرىلادى.
«راۋان شاعىناۋدانىنان باستاپ 18-شاعىناۋدانعا دەيىنگى اۋماقتى قامتيتىن 6,1 شاقىرىمدىق جاعالاۋ ايماعى كەزەڭ-كەزەڭىمەن جاڭعىرتىلادى. ونىڭ ىشىندە №5 جاعالاۋ قولدانىستا بولسا, قالعانىنىڭ جوبالىق قۇجاتتارى دايىندالۋدا. بيىل شومىلۋ ماۋسىمى اياقتالعان سوڭ №6 جانە №7 جاعاجايدا قۇرىلىس جۇمىستارى باستالادى دەپ جوسپارلانۋدا. ال №8 جاعاجاي ينۆەستور ەسەبىنەن اباتتاندىرىلادى دەپ كۇتىلۋدە», دەدى ول.
سونداي-اق ول كوممۋنالدىق جاعاجايلاردان بولەك, 140 دەمالىس ورنىنا قاتىستى جوسپارلارمەن ءبولىستى. قالا اكىمى قاپشاعاي سۋ قويماسىنىڭ جاعالاۋىندا تۋريستىك ايماقتاردىڭ كوپتىگىن, سول سەبەپتى, ولاردى دا ءبىر رەتتىلىككە, قالىپقا كەلتىرۋ ءۇشىن ديزاين-كود جاسالىپ, ۇسىنىس بەرىلەتىنىن تىلگە تيەك ەتتى. كاسىپكەرلەرمەن بىرلەسە وتىرىپ, قىزمەت كورسەتۋ ساپاسىن ارتتىرۋ جانە دەمالىس ورىندارىن ەستەتيكالىق جاعىنان ۇيلەستىرۋدىڭ دە ماڭىزى زور ەكەندىگىن ايرىقشا اتادى.
قالادا ءتۋريزمدى دامىتۋ ماقساتىندا 2025-2028 جىلدار ارالىعىندا جالپى سوماسى 306,4 ملرد تەڭگەنى قۇرايتىن 11 ينۆەستجوبا جۇزەگە اسادى دەپ جوسپارلانۋدا. ونىڭ قاتارىندا قوناق ۇيلەر, باسسەيندەر, گولف-كلۋب, ساۋدا ۇيلەرىن جانە باسقا دا نىساندار بار. وعان اكىمدىك تاراپىنان قاجەتتى مەملەكەتتىك قولداۋلار كورسەتىلەتىندىگىن ءمالىم ەتتى.
بۇعان دەيىن قالا اكىمى قىزمەت كورسەتۋ ساپاسىن ارتتىرۋ بويىنشا جيىن وتكىزىپ, وندا تازالىق, سانيتارلىق تالاپتار, قاۋىپسىزدىك جانە ءتارتىپتىڭ ساقتالۋى بويىنشا ناقتى تاپسىرمالار بەرىلگەن ەدى.
الماتى وبلىسى
