زاڭنامالىق نەگىز
2024 جىلعى 2 قىركۇيەكتە جاريالانعان پرەزيدەنت جولداۋىندا بيۋدجەت مۇمكىندىكتەرى مەن ازاماتتاردىڭ قاجەتتىلىكتەرىن ەسكەرە وتىرىپ, مەملەكەتتىك مەديتسينالىق كومەكتىڭ بىرىڭعاي بازالىق پاكەتىن قالىپتاستىرۋ تاپسىرىلعان بولاتىن. وسىعان سايكەس دەنساۋلىق ساقتاۋ مينيسترلىگى مەديتسينالىق كومەكتى قارجىلاندىرۋدىڭ ۇزاق مەرزىمدى تۇراقتىلىعىن قامتاماسىز ەتۋ جانە حالىق ءۇشىن مەديتسينالىق قىزمەتتەردى ءتيىمدى ۇيىمداستىرۋ ماقساتىندا بىرقاتار وزگەرىستەردى ىسكە اسىرىپ وتىر.
نەگىزگى ماقساتتار
بىرىڭعاي بازالىق پاكەتكە كەزەڭ-كەزەڭىمەن كوشۋ ارقىلى كەلەسى مىندەتتەر شەشىلەدى:
-
تەگىن مەديتسينالىق كومەكتىڭ كەپىلدىك بەرىلگەن كولەمى (تمككك) مەن ءمامس اراسىنداعى قايتالاناتىن قىزمەتتەردى بولدىرماۋ;
-
مەديتسينالىق قىزمەتتەر تىزبەسىن ناقتىلاۋ جانە اشىقتىعىن قامتاماسىز ەتۋ;
-
قىزمەت كورسەتۋدىڭ ساپاسىن جانە قولجەتىمدىلىگىن ارتتىرۋ;
-
دەنساۋلىق ساقتاۋ جۇيەسىنىڭ قارجىلىق تۇراقتىلىعىن نىعايتۋ;
-
ناقتى ساقتاندىرۋ مودەلىنە بىرتىندەپ كوشۋ.
بۇل باعىتتاعى نەگىزگى جاڭاشىلدىقتاردىڭ ءبىرى – اۋرۋلاردىڭ الدىن الۋ جانە ەرتە دياگنوستيكاعا ەرەكشە نازار اۋدارۋ. ماسەلەن, 2026 جىلدان باستاپ ونكولوگيالىق اۋرۋلاردى انىقتاۋعا ارنالعان سكرينينگتەر بارلىق ازاماتتارعا, ساقتاندىرۋ مارتەبەسىنە قاراماستان, قولجەتىمدى بولادى.
بىرىڭعاي پاكەت شەڭبەرىندە كورسەتىلەتىن قىزمەتتەر
ساقتاندىرىلماعان ازاماتتار ءۇشىن دە بىرقاتار مەديتسينالىق قىزمەتتەر قولجەتىمدى بولىپ قالا بەرەدى. اتاپ ايتقاندا:
-
ەمحانا دەڭگەيىندە العاشقى مەديتسينالىق-سانيتاريالىق كومەككە جۇگىنۋ;
-
ۆاكتسيناتسيا;
-
ونكولوگيالىق اۋرۋلارعا سكرينينگتەر;
-
الەۋمەتتىك ءمانى بار اۋرۋلارعا كۇدىك تۋىنداعان جاعدايدا دياگنوستيكالىق زەرتتەۋلەر;
-
جەدەل جانە شۇعىل مەديتسينالىق كومەك;
-
ينفەكتسيالىق اۋرۋلار كەزىندە ەمدەۋ;
-
دياگنوستيكا, ەمدەۋ جانە الدىن الۋ شارالارى (بارلىق الەۋمەتتىك ءمانى بار اۋرۋلار بويىنشا تەگىن دارىلىك زاتتارمەن قامتاماسىز ەتۋ);
-
قان كومپونەنتتەرىمەن قامتاماسىز ەتۋ;
-
پاللياتيۆتىك كومەك جانە ۇزاق مەرزىمدى كۇتىم.
بۇل شارالار الەۋمەتتىك مارتەبەسىنە قاراماستان حالىقتىڭ ءال-اۋقاتىن ارتتىرۋعا باعىتتالعان.
حالىقارالىق تاجىريبە
قازاقستانداعى باستامالار حالىقارالىق تاجىريبەگە نەگىزدەلگەن. مىسالى:
-
رەسەيدە تەگىن مەديتسينالىق كومەك پاكەتى سانيتاريالىق اۆياتسيانى, ايتۆ/جيتس, تۋبەركۋلەز, جىنىستىق جولمەن بەرىلەتىن ينفەكتسيالار مەن پسيحيكالىق اۋرۋلاردى قامتيدى.
-
ەستونيادا – جەدەل مەديتسينالىق كومەك, ايتۆ/جيتس, ينفەكتسيالار, تۋبەركۋلەز جانە پسيحيكالىق اۋرۋلار بويىنشا قىزمەتتەر كورسەتىلەدى.
-
ليتۆادا مەديتسينالىق كومەك تەك جەدەل جاعدايلارمەن شەكتەلگەن.
-
گەرمانيا مەن نيدەرلاندىدا بۇل قىزمەتتەر نەگىزىنەن مەيىرگەرلىك كۇتىمدى قامتيدى.
قارجىلىق تۇراقتىلىق
بىرىڭعاي پاكەتتى قالىپتاستىرۋ بارىسىندا دەنساۋلىق ساقتاۋ مينيسترلىگى سىرتقى ساراپشىلارمەن بىرلەسە وتىرىپ, بارلىق مەديتسينالىق قىزمەتتەر مەن ولاردىڭ قۇنىن جان-جاقتى تالداۋدان وتكىزدى. بۇل ءتاسىل رەسۋرستاردى وڭتايلى بولۋگە, مەديتسينالىق قىزمەتتەردى قارجىلاندىرۋ تەتىكتەرىن جەتىلدىرۋگە جانە جۇيەنىڭ تۇراقتىلىعىن قامتاماسىز ەتۋگە مۇمكىندىك بەرەدى.
بىرىڭعاي بازالىق پاكەتكە كوشۋ – حالىق دەنساۋلىعىن قورعاۋ باعىتىندا قابىلدانىپ وتىرعان جۇيەلى جانە ماڭىزدى قادام. بۇل باستاما مەديتسينالىق قىزمەتتەردىڭ ناقتى قۇرىلىمىن قالىپتاستىرىپ, ازاماتتارعا كورسەتىلەتىن كومەكتى اشىق ءارى ءتيىمدى ەتۋگە باعىتتالعان. دەنساۋلىق ساقتاۋ سالاسىنداعى بۇل وزگەرىستەردىڭ باستى ماقساتى – ساپالى, قولجەتىمدى جانە الەۋمەتتىك ادىلەتتى مەديتسينالىق قىزمەت كورسەتۋ.
