ءىس-شارا اياسىندا دوستىق ۇيىندە 30 وزگە ەتنوس وكىلىنىڭ قاتىسۋىمەن نەبارى 20 مينۋت ىشىندە 4546 دانا قۇرت دايىندالىپ, قازاقستاندىق كينەس رەكوردتار كىتابىنا ەندى. بۇل كورسەتكىش – تەك ساندىق جەتىستىك ەمەس, ورتاق ماقسات جولىندا جۇمىلعان جۇرتشىلىقتىڭ ۇيىمشىلدىعى مەن ىنتىماعىنىڭ ناقتى كورىنىسى بولدى. ۇلتتىق تاعامدى ۇلىقتاۋ ارقىلى ەل بىرلىگىنىڭ سيمۆولى ايشىقتالدى.
مەرەكەلىك شارا الدىمەن باستوبە اۋىلىنداعى «قازاق حالقىنا مىڭ العىس!» مونۋمەنتىندە گۇل شوقتارىن قويۋ راسىمىمەن باستالدى. كەيىنگى رەسمي بولىمدە ەل بىرلىگى مەن قوعامدىق كەلىسىمدى نىعايتۋعا ۇلەس قوسقان ازاماتتار ماراپاتتالدى.
ۇيىمداستىرۋشىلاردىڭ ايتۋىنشا, بۇل باستاما – العىس ايتۋ مادەنيەتىن دارىپتەپ قانا قويماي, ەتنوسارالىق تاتۋلىق پەن قوعامدىق كەلىسىمدى نىعايتۋدىڭ جارقىن ۇلگىسى.
وسىلايشا, العىس ايتۋ كۇنى قاراتالدا جاڭا تاريحي ناتيجەمەن ەستە قالدى. بىرلىك پەن ريزاشىلىقتى تۋ ەتكەن يگى شارا ەل ىنتىماعىن تاعى ءبىر مارتە ايقىندادى.
