«كەشە يراندا قىزدارعا ارنالعان مەكتەپكە جاسالعان اۋە سوققىسى سالدارىنان ونداعان بالا قازا تاۋىپ, كوپتەگەن بالا جاراقات الدى. ءبىز قۇقىق قورعاۋ سالاسىنداعى ارىپتەستەرىمىزبەن بىرگە بۇل قاسىرەتتى وقيعاعا قاتتى كۇيزەلدىك», دەدى ول.
ونىڭ ايتۋىنشا, مەكتەپتەر – «بەيبىت ايماقتار», ال ءبىلىم بەرۋ مەكەمەلەرىنە جاسالعان شابۋىل حالىقارالىق قۇقىقتىڭ بۇزىلۋى بولىپ سانالادى.
«بالالار – كەز كەلگەن قاقتىعىستا ەڭ وسال توپ. ولار سوعىستى تاڭداعان جوق, ساياسي شەشىمدەر قابىلدامايدى جانە ەرەسەكتەردىڭ ارەكەتتەرى ءۇشىن جاۋاپتى ەمەس. الايدا ەڭ اۋىر زارداپتى ءدال سولار شەگەدى. بالالار جاپا شەكپەۋى, قورقىنىش سەزىنبەۋى ءتيىس», دەيدى د.زاكيەۆا.
قازاقستان ءاردايىم كەلىسپەۋشىلىكتەردى بەيبىت جولمەن, كەلىسسوزدەر ارقىلى, بەيبىتشىلىك, تۇراقتىلىق جانە قاۋىپسىزدىك جولىندا رەتتەۋدى قولداپ كەلەدى.
ء«بىز حالىقارالىق قاۋىمداستىقتى بالالاردى جانە ولاردىڭ بولاشاعىن ساقتاۋ ءۇشىن ديالوگقا شاقىرامىز. ءبىزدىڭ ورتاق مىندەتىمىز – بالالارعا تىنىش ءارى اشىق اسپان استىندا ءومىر ءسۇرۋ قۇقىعىن قايتارۋ. بەيبىتشىلىك – ءاربىر بالانىڭ قۇقىعى», دەدى بالالار قۇقىعى بويىنشا ۋاكىل.
ايتا كەتەيىك, يراننىڭ وڭتۇستىگىندەگى ميناب قالاسىنداعى «شادجارە تايەبە» قىزدارعا ارنالعان باستاۋىش مەكتەپكە جاسالعان شابۋىلدان قازا تاپقاندار سانى 148 ادامعا, ال جارالانعاندار سانى 95 ادامعا جەتتى.
