فوتو: ءماجىلىستىڭ ءباسپاسوز قىزمەتى
ساپار اياسىندا دەپۋتات كامەننىي برود اۋىلىنداعى «ساۋمالكول اگرو» جشس ۇجىمىمەن كەزدەسىپ, مەملەكەت تاراپىنان كورسەتىلىپ جاتقان قولداۋ تەتىكتەرى مەن جەڭىلدەتىلگەن نەسيە شارتتارىن ءتۇسىندىردى.
«اۋىلعا كەلۋىمىزدىڭ باستى سەبەبى – كوكتەمگى ەگىن ناۋقانىنان كەيىنگى احۋالدى باعالاۋ. الدىمىزدا وراق ماۋسىمى كەلە جاتىر. بۇگىن, مىنە, وسى شارۋاشىلىقتا كۇزدە ەگىلگەن قارا بيدايدى ورۋ ناۋقانى باستالماق. ۇجىم بىزدەن ونى سيمۆوليكالىق تۇردە باستاپ بەرۋىمىزدى سۇرادى. جالپى جاعداي جامان ەمەس. ەڭبەككەرلەر جالاقىسىن ۋاقىتىلى الۋدا, جەم-ءشوپ ماسەلەسى دە شەشىمىن تاۋىپ جاتىر», دەدى سەرىك ەگىزباەۆ.
سەرىك ەگىزباەۆ 2023 جىلى شارۋالار ءۇشىن قيىن كەزەڭ بولعانىن, سول ۋاقىتتا بانكتەردەن 22 پايىزدىق مولشەرلەمەمەن نەسيە الۋعا ءماجبۇر بولعانىن ەسكە سالدى. الايدا مەملەكەت باسشىسىنىڭ باستاماسىمەن اۋىل شارۋاشىلىعىنا بەرىلەتىن نەسيەلەر بۇگىندە 5 پايىزعا دەيىن تومەندەپ, كەپىل شارتتارى جەڭىلدەگەنىن ايتتى. سونداي-اق, دەپۋتات فەرمەرلەر ءۇشىن ققس-تى ەسەپتەۋدىڭ 16/80 ۇلگىسى بويىنشا وزگەرگەنىن جانە بۇل وزگەرىستەر ءماجىلىس دەپۋتاتتارىنىڭ باستاماسىمەن ەنگىزىلگەنىن اتاپ ءوتتى.
سونىمەن قاتار اگروونەركاسىپتىك كەشەندى قارجىلاندىرۋ كولەمى بىرنەشە ەسە ءوسىپ, 140 ملرد تەڭگەدەن 700 ملرد تەڭگەگە دەيىن ارتقانىنا توقتالدى. بۇل جەتىستىك – پارلامەنتتىڭ جۇيەلى جۇمىسى مەن پرەزيدەنتتىڭ ناقتى ساياسي شەشىمدەرىنىڭ ناتيجەسى ەكەنىن جەتكىزدى.
ساپار بارىسىندا سەرىك ەگىزباەۆ ەگىس القاپتارىن ارالاپ, دالا جۇمىستارىمەن تانىستى. اۋىل ەڭبەككەرلەرىمەن تىلدەسىپ, ولاردىڭ ۇسىنىستارى مەن پىكىرلەرىن تىڭداپ, ءوز جۇمىسىندا ەسكەرۋگە ۋادە بەردى.
