بىلتىرعى جىل قورىتىندىسىندا ورتا ءدالىز ارقىلى تاسىمال كولەمى بۇرناعى جىلمەن سالىستىرعاندا 65%-عا ارتقان ەدى. ەۋرازيا كەڭىستىگىنىڭ ورتاسىنا ورنالاسقان ەلىمىزدە 11 حالىقارالىق ترانزيتتىك ءدالىز بار ەكەنى ءمالىم. ولاردىڭ وتكىزۋ قابىلەتىن ارتتىرۋ مەن جۇك تاسىمالىنداعى جاعدايدى جاقسارتۋ ماقساتىندا جالپى ۇزىندىعى 1,3 مىڭ كم بولاتىن 4 ءىرى تەمىرجول جوباسىنىڭ قۇرىلىسى جۇرگىزىلۋدە. اتاپ ايتقاندا دوستىق – مويىنتى, الماتى اينالما جەلىسى, داربازا – ماقتاارال, باقتى – اياگوز تەمىرجول ماگيسترالدارى بار. وسىناۋ جولدار تاۋار تاسىمالداۋ مەن لوگيستيكالىق ينفراقۇرىلىمدى جاقسارتۋ ءۇشىن ستراتەگيالىق ماڭىزعا يە بولىپ وتىر.
ەستە بولسا, وتكەن جىلى 12 مىڭ كم اۆتوجول جوندەۋدەن وتسە, سونىڭ 7 مىڭىندا جۇمىس مارەسىنە جەتتى. قاراعاندى – الماتى, تالدىقورعان – وسكەمەن, اقتوبە – قاندىاعاش, بۇقتىرما كوپىرى, شامالعانداعى جول ايرىعى مەن تۇركىستان وڭىرىندەگى تۋنەل ترانزيتتىك قوزعالىستىڭ ساپاسىن ەداۋىر ارتتىردى. بيىل جوندەۋ جۇمىستارى 13 مىڭ كم جولدى قامتيدى. ونىڭ قاتارىندا رەسپۋبليكالىق ماڭىزى بار جولداردىڭ 2 مىڭ كم-دە قايتا جاڭعىرتۋ, وبلىس ورتالىقتارى اراسىنداعى 6,6 مىڭ جانە جەرگىلىكتى جولداردىڭ 4,2 مىڭ كم-ءى جوندەلمەك. بۇيىرتسا, جوسپار بويىنشا جىل سوڭىنا دەيىن 9 مىڭ كم جولدا جۇمىس تولىق اياقتالادى دەگەن ءۇمىت بار.
ەل پرەزيدەنتىنىڭ تاپسىرماسىنا سايكەس, 10 مىڭ كم ترانزيتتىك اۆتوجولدا ورتاشا جوندەۋ جۇمىستارى جالعاسىن تاۋىپ جاتىر. بۇل جوبا «قازاقستان دامۋ بانكى» ارقىلى قارجىلاندىرىلعان. اتقارىلىپ جاتقان جوندەۋ جۇمىستارى وڭىرارالىق جانە اۋدانارالىق بايلانىستاردى تۇزەيدى. ونداعى نەگىزگى باعىتتار – قاندىاعاش – شالقار, جەزقازعان – پەتروپاۆل, اتىراۋ – دوسسور, جاڭاوزەن – كەندىرلى – تۇرىكمەنستان شەكاراسى, قاراعاندى – اياگوز.
«ورتاشا جوندەۋ رەكونسترۋكتسيامەن سالىستىرعاندا 7 ەسە ارزان ءارى 2 ەسە جىلدام جۇرەدى, سوندىقتان بۇل ءادىس ترانزيتتىك ينفراقۇرىلىمدى ءتيىمدى دامىتۋعا مۇمكىندىك بەرەدى. مۇنداي شارالار رەسپۋبليكالىق جولداردىڭ 94%-ىن نورماتيۆتىك تالاپتارعا سايكەستەندىرۋگە جول اشادى. بۇل ءوز كەزەگىندە ترانزيت اعىنىن تارتۋعا, قوزعالىس قاۋىپسىزدىگىن ارتتىرۋعا جانە ەكونوميكالىق تيىمدىلىككە وڭ اسەر ەتەدى», دەيدى كولىك مينيسترلىگى, اۆتوجول كوميتەتى توراعاسىنىڭ ورىنباسارى جامبىل باقتيار.
