480 بەتتىك قالىڭ كىتاپ جەڭىل وقىلادى. مۇنداعى ءازىل-سىقاق اڭگىمەلەر پەندە بولمىسىنىڭ قيقار-قيعاش مىنەزدەرىن ءار قىرىنان كورسەتە وتىرىپ, قوعامداعى كەرەعارلىقتىڭ ءتۇپ-تامىرىنا ءاجۋا-مىسقىلمەن سىلتەمە جاسايدى. ءار اڭگىمەدەن وزىمىزگە «تانىس تا بەيتانىس» كىسىلەردى جولىقتىرامىز. ماسەلەن, «ليفتىگە دە ءتىل ءبىتتى» دەگەن سىقاق اڭگىمەدە وزگەنى عايباتتايتىندار سىن تەزىنە الىنعان. ء«وزى جوقتىڭ كوزى جوق» دەمەكشى, ءار قاباتقا توقتاعان سايىن, ليفت ىشىندەگىلەر جاڭا عانا قاسىندا تۇرعان ادامدى «نەشە ءتۇرلى پەندە بار-اۋ!» دەپ عايباتتاي جونەلەدى. كەيىن سول كىسىنى دە باسقالار سوزبەن سىبايدى. بىراق كوزىنشە ەمەس. اقىر سوڭىندا 12-قاباتقا كوتەرىلىپ ءىشى بوساپ قالعان ليفتىگە دە ءتىل ءبىتىپ, پەندەلەرگە وكپە-نازىن توگىپ سالادى. وسىلايشا, اۆتور ەشكىمدى جازعىرماي-اق, وقىرمان قولىنا «اينا ۇستاتا قويادى». اڭگىمەدەن ءوزىن كورگەندەر ىشتەي قىمسىنىپ, بەتى قىزارارى ءسوزسىز.
جالپى, كۇلكىنىڭ ءبارى كوزگە ۇرىپ, مەن مۇندالاپ تۇرمايدى. قالىپتى بولىپ كەتكەن قۇبىلىستارعا جاسىرىنىپ, تىعىلىپ جۇرەدى. عالىم تەمىربەك قوجاكەەۆ ايتپاقشى, «يۋمورلىق سەزىم عانا كوميزمدى كەز كەلگەن تىعىلعان ىنىنەن سۋ قۇيىپ سۋىرىپ الىپ, ەل الدىنا سۇيرەپ شىعادى, قاعىپ-سىلكىپ كەلەكە ەتىپ, شاڭىن قاعادى». ساتيرا ساردارى بەرىك سادىردىڭ قاعابەرىستەگىنى قالت جىبەرمەيتىن قىرانكوز بايقاعىشتىعى مەن سول بايقاعانىن ازىلمەن ارلەندىرىپ, «جايپاعىشتىعى» كوڭىل قۋانتادى. ماسەلەن, «جاساسىن فونوگرامما!» دەگەن سىقاق اڭگىمەسىندە اۆتور جاساندى داۋىسپەن ءان ايتاتىنداردى يرونيا ارقىلى مازاقتىڭ وتىنا قاقتايدى. ءيا, بۇل اڭگىمەنى وقىعان ادام قارقىلداپ كۇلمەيدى. اششى كۇلكى كومەيگە كەلىپ, كەپتەلىپ قالادى. وسى كۇنى ەكى ساعات ءان ايتسا دا جانىن جەپ ايتپايتىن كەيبىر انشىلەرگە كوزىمىز دە, قۇلاعىمىز دا ۇيرەندى عوي. سوندىقتان دا اۆتور بۇل ماسەلەگە باسقا قىرىنان كەلەدى. وسى ءبىر ساتيرالىق شىعارمادا جانازا وقيتىن مولدانىڭ ءوزى فونوگراممانىڭ راقاتىن كورىپ ءجۇر ەكەن. ال باس كەيىپكەر باتا مەن تىلەكتى دە جاساندى داۋىسپەن ايتاتىن كۇنگە جەتىپتى. اڭگىمە اسىرەلەنىپ جازىلسا دا اسەرلى, وقيعاسى نانىمدى. ويتكەنى ساتيرا – ۇلكەيتكىش اينەك, ول ءاربىر نارسەگە لۋپامەن قارايدى. ءسويتىپ, كۇلدىرىپ وتىرىپ, كۇيدىرىپ جىبەرەدى. ال «بىلگىر شاكىرتتەر» اڭگىمەسىندە جاتتاندى, قۇرعاق سويلەيتىن ۇرانشىل ۇرپاق سىن تەزىنە الىنعان. وقۋشىلاردىڭ نە ايتقانىنا ەمەس, ايتەۋىر سويلەگەنىنە ريزا بولاتىن كەيبىر مۇعالىمدەر دە تىكەندى تىلمەن اياۋسىز اشكەرەلەنگەن. ديالوگكە قۇرىلعان اڭگىمەدە ولاردىڭ بەينەسى ءوز سوزدەرىنەن-اق تانىلادى.
ساتيرالىق شىعارمالاردا بارلىق ادامنىڭ كەم-كەتىگىن بويىنا جيناعان تيپتىك بەينە بولادى. «قىزىم ساعان ايتامىن, كەلىنىم, سەن تىڭدا» دەگەندەي جازۋشى سول تيپتىك بەينەسىن مازاقتاعانىمەن, شىن مانىندە وقىرمانىن ءاجۋالايدى. سول سەكىلدى بەرىك سادىردىڭ پىقىپ ەسىمدى كەيىپكەرى – تيپتىك بەينە. اۆتور پىقىپتى نۇقىپ وتىرعانىمەن, ءسىز بەن ءبىزدى تۇقىرتىپ وتىرعانىن ەستەن شىعارمايىق.
