وبلىستىق توتەنشە جاعدايلار دەپارتامەنتى باستىعىنىڭ ورىنباسارى سىرىم جايماعامبەتوۆتىڭ دەرەگىنە سۇيەنسەك, مۇنايلى ءوڭىردىڭ قۇرىلىس يندۋسترياسىندا كوپقاباتتى ۇيلەر مەن وزگە دە نىسانداردى سالۋعا 28 مۇنارالى كران قولدانىلادى. سونداي بيىك كراندى باعىندىرعانداردىڭ قاتارىندا اتىراۋلىق ءرازيا ەرىمبەتوۆا دا بار.
ءوزىنىڭ ايتۋىنا قاراعاندا, 1984 جىلى مەكتەپ بىتىرگەن بويجەتكەن اۋەلى سىلاقشى ماماندىعىنىڭ قىر-سىرىن مەڭگەرۋدى كوزدەپتى. ءسويتىپ, سول كەزدەگى «گۋرەۆنەفتەحيمستروي» وندىرىستىك بىرلەستىگىنىڭ التى ايلىق كۋرسىنا جازىلعان. الايدا كاسىپورىنداعى بىلىكتى ماماندار كران وپەراتورى بولۋدى ۇسىنىپتى. بيىل ونىڭ كراندى ۇرشىقشا ۇيىرگەنىنە 41 جىلدان استى.
– ءبىزدىڭ وتباسىمىزدا بۇل ماماندىقپەن جۇمىس ىستەيتىندەر جوق ەدى. باستاپقىدا ويلانىپ قالدىم. بىراق نەگە ەكەنىن بىلمەيمىن, كوڭىلىمدە كران شتۋرۆالىنا وتىرۋعا دەگەن قىزىعۋشىلىق وياندى. بىرنەشە جاس التى اي بويى كران وپەراتورى ماماندىعىن وقىدىق. اراسىندا تاجىريبەدەن ءوتۋ ءۇشىن قۇرىلىس الاڭىنداعى كرانعا وتىرعىزادى. البىرت كەزىمىز عوي, بيىك مۇناراداعى كران كابيناسىنان توڭىرەككە كوز سالۋ قىزىقتىرعان شىعار, – دەيدى ءرازيا ەرىمبەتوۆا.
ول 1985 جىلى العاش رەت بيىكتەگى كراننىڭ شتۋرۆالىنا وتىردى. سول كەزدە 18 جاستا ەدى. سودان بەرى ءوزى تاڭداعان ماماندىعىنا ادالدىقتان تانبادى. ءالى دە بيىك قۇرىلىستىڭ دەر كەزىندە بوي كوتەرۋىنە ۇلەسىن قوسىپ كەلەدى. كەيىنگى 11 جىلدان بەرى «Direct Construction Service» جشس-دە جۇمىس ىستەيدى.
– العاشقى كەزدە قوبالجىعانىم راس. بىراق بىلىكتى مامانداردىڭ كەڭەسىن تىڭداپ, تاجىريبەسىنەن ۇيرەنۋگە تىرىستىم. ەڭ باستىسى جۇمىسىڭدى جاۋاپكەرشىلىكپەن اتقارۋعا ۇمتىلۋ قاجەت. بيىك نىسانعا قاجەتتى ماتەريالدى دالدىكپەن جەتكىزۋگە ەپتىلىك تە, تاباندىلىق تا كەرەك, – دەيدى ول.
اتىراۋداعى ءزاۋلىم تۇرعىن ۇيلەر مەن عيماراتتاردىڭ قۇرىلىسىنا قولتاڭباسىن قالدىرىپ كەلەدى. سونداي عيماراتتىڭ قاتارىندا «Marriott Executive Apartments Atyrau» قوناقۇيى بار. مۇنايلى شاھارداعى بيىك نىسان – مۇنايلى وڭىردەگى شەتەلدىكتەر تۇراتىن تاڭداۋلى مەكەننىڭ ءبىرى.
– بۇل قوناقۇيدىڭ قۇرىلىسىن سالۋعا مەن دە اتسالىستىم. سول كەزدە قىتايدا شىعارىلعان كرانمەن 96 مەتر بيىكتە جۇمىس ىستەدىم. كەيىنگى جىلدارى اتىراۋدا دا اسەمدىگىمەن كوز تارتاتىن تۇرعىن ۇيلەر بوي كوتەردى. سونداي نىسانداردىڭ قۇرىلىسىندا قولتاڭبامنىڭ بارىنا مارقايامىن. ماقساتىم – قالامىزدا اسەم عيماراتتاردى تۇرعىزۋعا, ەلىمىزدىڭ وركەندەۋىنە ۇلەس قوسۋ, –دەيدى ر.ەرىمبەتوۆا.
قازىر ول رەسەيدە قۇراستىرىلعان كرانمەن جۇمىس ىستەۋدى مەڭگەرىپتى. كۇن سايىنعى جۇمىسىنا كىرىسپەس بۇرىن باسشىلاردىڭ تاپسىرماسىن الادى. جاز مەزگىلىندەگى جۇمىسى تاڭعى ساعات 7:00-دە باستالىپ, 12 ساعاتقا دەيىن سوزىلادى. ال قىستا 8–9 ساعات جۇمىس اتقارادى.
اكە-شەشەسى كران وپەراتورى ماماندىعىن تاڭداعان قىزىنىڭ قالاۋىنا قارسىلىق بىلدىرمەپتى. ال كۇيەۋى امانگەلدىمەن 9-10-سىنىپتا بىرگە وقىعان. كەيىن اۋعانستاندا اسكەري بورىشىن وتەپ كەلگەسىن, وتباسىن قۇرۋعا شەشىم قابىلداپتى. ەكەۋى ءتورت قىز, ءبىر ۇلدى ومىرگە اكەلدى. قىزدارى تەڭىن تاۋىپ, تۇرمىسقا شىقتى, ۇلى 11-سىنىپتا وقيدى.
– كرانمەن بيىككە قۇرىلىس ماتەريالىن كوتەرۋ وڭاي ەمەس. قازىر ۇيرەندىم عوي دەگەنىممەن, قاۋىپسىزدىك تەحنيكاسىنا قاتاڭ ساقتايمىن. ويتكەنى كرانمەن كوتەرگەن جۇكتى قابىلداپ الاتىن ارىپتەستەرىمنىڭ ءومىرى بارىنەن قىمبات ەكەنىن تۇسىنەمىن. باسشىلارىمىز كران كابيناسىنا جازدا اۋانى سالقىنداتاتىن, قىستا جىلىتاتىن قوندىرعى ورناتىپ بەردى. اي سايىنعى تابىسىم كوڭىلىمنەن شىعادى, – دەيدى ول.
ارىپتەستەرى كوپبالالى اناعا ۇدايى قۇرمەت كورسەتەدى. ءوزى جۇمىسىنان سوڭ ۇيىنە اسىعادى. ويتكەنى وتباسىنىڭ بەرەكەسىن كىرگىزگەن ونىڭ ۇيىنە امان ورالۋىن وتباسى مەن جاسى جۇزگە تاياعان قارت اناسى كۇتىپ وتىرادى.
اتىراۋ وبلىسى
