ازاماتتىق اۆياتسيانىڭ دامىتۋ بارىسىن جوعارى باعالاعان ول ەلىمىزدىڭ زاماناۋي ستاندارتتاردى ەنگىزۋگە, ءتيىمدى مەملەكەتتىك ساياسات جۇرگىزۋگە جانە ادامي كاپيتالعا باسا كوڭىل بولگەنى ءۇشىن العىسىن ءبىلدىردى. ونىڭ ايتۋىنشا, اۆياتسيا — بۇل جاي عانا ۇشۋ ەمەس, ادامداردى, مادەنيەتتەر مەن ەلدەردى بىرىكتىرەتىن الەۋمەتتىك-ەكونوميكالىق دامۋدىڭ قۋاتتى قۇرالى.
يكاو باسشىسى قازىرگى الەمدىك اۆياتسيا الدىندا تۇرعان ماڭىزدى سىن-قاتەرلەردى دە اتاپ ءوتتى: 2050 جىلعا قاراي جولاۋشىلار سانىنىڭ 12 ميللياردقا دەيىن ءوسۋى, اۆياتسيالىق وقيعالاردى جويۋ قاجەتتىگى, كومىرتەكتى بەيتاراپتىق ستراتەگياسىن جۇزەگە اسىرۋ جانە سالانىڭ شىنايى ينكليۋزيۆتىلىگىنە قول جەتكىزۋ, سونىڭ ىشىندە ايەلدەر ءۇشىن تەڭ مۇمكىندىكتەردى قامتاماسىز ەتۋ مىندەتتەرى بار.
ءسوزىنىڭ ماڭىزدى بولىگى ايەلدەردىڭ اۆياتسيا سالاسىنا قاتىسۋىنا ارنالدى. قازىرگى تاڭدا ولاردىڭ جاھاندىق اۆياتسياداعى ۇلەسى 5%-دان اسپايدى, ال ءوسىم قارقىنى باياۋ. دەگەنمەن, شاككيتانو مىرزانىڭ ايتۋىنشا, قازاقستان بۇل باعىتتا وڭ ناتيجەلەر كورسەتىپ, گەندەرلىك تەڭدىكتى ىلگەرىلەتۋدە بەلسەندى ۇستانىم تانىتىپ وتىر.
اكادەميادا يكاو ۇسىنعان CBTA (قۇزىرەتتىلىككە نەگىزدەلگەن وقىتۋ) مودەلىنە ەرەكشە نازار اۋدارىلىپ كەلەدى. وقۋ پروتسەسى پيلوتتاردى, ديسپەتچەرلەردى, ينجەنەرلەردى, سونداي-اق باسقارۋشى كادرلار مەن اۆياتسيا سالاسىنداعى زەرتتەۋشىلەردى دايارلاۋدى قامتيدى. وقۋ باعدارلامالارى ۇلتتىق جانە حالىقارالىق ستاندارتتارعا سايكەس كەلەدى, يكاو مەن IATA اككرەديتاتسيالارىنا يە, ALICANTO جانە TRAINAIR PLUS سياقتى جاھاندىق باستامالارعا قاتىسادى جانە شەتەلدىك سەرىكتەستەرمەن بىرلەسىپ اۆتورلىق كۋرستاردى ازىرلەۋدە.
رەكتور بەكەن سەيداحمەتوۆتىڭ ايتۋىنشا, يكاو باسشىسىنىڭ ساپارى — بۇل ماقتانىش قانا ەمەس, سونىمەن قاتار اكادەميانىڭ حالىقارالىق ينتەگراتسياسىنا جانە ودان ءارى دامۋىنا تىڭ سەرپىن بەرەتىن ماڭىزدى كەزەڭ. اكادەميا بىلىمبەرۋ ۇيىمى بولۋمەن قاتار, يكاو-نىڭ وڭىرلىك سەرىكتەسىنە اينالىپ, اۆياتسيالىق ءبىلىم بەرۋ سالاسىنداعى جاھاندىق باستامالاردى جۇزەگە اسىرۋعا ارنالعان حالىقارالىق پلاتفورما بولۋعا ۇمتىلادى.
ساپاردىڭ باستى ناتيجەلەرىنىڭ ءبىرى — قازاقستاننىڭ ازاماتتىق اۆياتسياسىن 2050 جىلعا دەيىن دامىتۋ جونىندەگى بۇرىن قول قويىلعان ماستەر-جوسپاردىڭ راستالۋى بولدى. بۇل قۇجات يكاو-مەن بىرلەسىپ دايىندالعان جانە تمد ءوڭىرى ءۇشىن بىرەگەي تاجىريبە بولىپ تابىلادى. قۇجاتتىڭ نەگىزىندە ينفراقۇرىلىمدى جاڭعىرتۋ, كادرلار دايارلاۋ ساپاسىن ارتتىرۋ, تسيفرلىق جانە ورنىقتى شەشىمدەردى كەڭىنەن ەنگىزۋ, سونداي-اق قازاقستاننىڭ ەۋروپا مەن ازيا اراسىنداعى ترانزيتتىك حاب رەتىندەگى ءرولىن نىعايتۋ باسىم باعىتتار رەتىندە بەلگىلەنگەن. بۇل ماستەر-جوسپار جاھاندىق ۇردىستەر مەن وڭىرلىك ەرەكشەلىكتەردى ەسكەرە وتىرىپ, سالانى جۇيەلى تۇردە ترانسفورماتسيالاۋعا نەگىز قالايدى.
بۇگىندە قازاقستان تەك حالىقارالىق ستاندارتتاردى قابىلداۋشى ەل عانا ەمەس, سونىمەن قاتار ولاردى ازىرلەۋگە قاتىسۋشى رەتىندە دە ءوزىن تانىتىپ كەلەدى. ەلدى وڭىرلىك قۇزىرەت جانە ءبىلىم ورتالىعىنا اينالدىرۋ, بىلىمبەرۋ قىزمەتتەرىن ەكسپورتتاۋعا باعىتتالعان عىلىمي-ءبىلىم بەرۋ كلاستەرلەرىن قۇرۋ, حالىقارالىق سەرىكتەستەرمەن بىرلەسىپ تسيفرلىقجانە سيمۋلياتسيالىق شەشىمدەردى (ۆيرتۋالدى جانە تولىقتىرىلعان شىندىق تەحنولوگيالارىن قوسا) ەنگىزۋ, اكادەميالىق ۇتقىرلىقتى كەڭەيتۋ جانە جەتەكشى شەتەلدىك ۋنيۆەرسيتەتتەرمەن بىرلەسكەن باعدارلامالاردى جۇزەگە اسىرۋ ماسەلەلەرى تالقىلاندى.
سونىمەن قاتار, ماماندار دايارلاۋدىڭ جاڭا تەحنولوگيالىق جاعدايلارعا بەيىمدەلۋىن قامتاماسىز ەتۋ ماقساتىندا كادرلىق تاۋەلسىزدىكتى نىعايتۋعا, سالانىڭ تۇراقتىلىعىن ارتتىرۋعا جانە وقىتۋدىڭ جاڭا ءبىلىم بەرۋ تەحنولوگيالارىن ەڭگىزۋگە ەرەكشە كوڭىل بولىنۋدە. اعىلشىن تىلىندەگى باعدارلامالاردى دامىتۋ, الەمنىڭ جەتەكشى ۋنيۆەرسيتەتتەرىمەن ەكىجاقتى كەلىسىمدەر جانە جاھاندىق اكادەميالىق پلاتفورمالارعا قاتىسۋ – مۇنىڭ ءبارى تۇراقتى جانە حالىقارالىق دەڭگەيدە تانىلعان ءبىلىم بەرۋ پروتسەسىنىڭ نەگىزىن قالايدى.
سونداي-اق, ازاماتتىق اۆياتسيا سالاسىنداعى حالىقارالىق ىنتىماقتاستىقتى دامىتۋعا قوسقان ەلەۋلى ۇلەسى ءۇشىن ازاماتتىق اۆياتسيا اكادەمياسى يكاو كەڭەسىنىڭ پرەزيدەنتى سالۆاتورە شاككيتانوعا جانە يكاو-نىڭ ەۋروپا جانە سولتۇستىك اتلانتيكا بيۋروسىنىڭ (EUR/NAT) وڭىرلىك ديرەكتورى نيكولاس راللوعا «ازاماتتىق اۆياتسيا اكادەمياسىنىڭ قۇرمەتتى پروفەسسورى» اتاعىن بەردى.
يكاو كەڭەسى پرەزيدەنتىنىڭ قازاقستانعا ساپارى — ەلدىڭ قول جەتكىزگەن ناتيجەلەرىن حالىقارالىق دەڭگەيدە مويىنداۋدىڭ بەلگىسى عانا ەمەس, سونىمەن قاتار جاڭا كەزەڭنىڭ باستاۋ نۇكتەسى. بۇگىندە يكاو مەن قازاقستان اراسىنداعى ىنتىماقتاستىق فورمالدى ديالوگ شەڭبەرىنەن شىعىپ, ورنىقتى اۆياتسيالىق بولاشاققا باعىتتالعان ءوزارا ءتيىمدى سەرىكتەستىككە اينالىپ كەلەدى.
ازاماتتىق اۆياتسيا اكادەمياسى ۇلتتىق ءارى وڭىرلىك دەڭگەيدە اۆياتسيا ماماندارىن دايارلايتىن ورتالىق رەتىندەگى مارتەبەسىن نىعايتىپ, تەك حالىقارالىق ستاندارتتارعا ساي بولۋمەن شەكتەلمەي, اۆياتسيالىق ءبىلىم بەرۋ سالاسىنداعى جاھاندىق كۇن ءتارتىبىن قالىپتاستىرۋعا دا ءوز ۇلەسىن قوسۋدى كوزدەيدى.
الماتى
