فوتو: eskeldi-eli.kz
ءبىرىنشى ۆيتسە-ءمينيستردىڭ مالىمەتىنشە, ەلىمىزدە بۇگىنگى تاڭدا 11 854 مەكتەپكە دەيىنگى ۇيىم جۇمىس ىستەيدى. ولاردا 1 ميلليوننان استام بالا تاربيەلەنىپ جاتىر. ونىڭ ىشىندە:
- 5 456 مەملەكەتتىك بالاباقشادا — 467 مىڭ بالا;
- 6 398 جەكەمەنشىك بالاباقشادا — 541 مىڭ بالا قامتىلعان.
سونىمەن قاتار, 2-6 جاس ارالىعىنداعى 98 مىڭ بالا مەكتەپكە دەيىنگى ۇيىمعا كەزەكتە تۇر. بۇل كورسەتكىش مەكتەپكە دەيىنگى ءبىلىم بەرۋ قىزمەتىنە اتا-انالاردىڭ سۇرانىسىن ەسكەرە وتىرىپ ەسەپتەلەدى.
الايدا كەيبىر وڭىرلەردە قامتۋ دەڭگەيى تومەن:
- قىزىلوردا وبلىسىندا — 84,3%;
- شىعىس قازاقستان وبلىسىندا — 88,0%;
- قاراعاندى وبلىسىندا — 88,7%;
- الماتى قالاسىندا — 87,0%;
- استانا قالاسىندا — 88,4%;
- شىمكەنت قالاسىندا — 84,2%.
ۇلتتىق ستاتيستيكا بيۋروسىنىڭ مالىمەتىنشە, 2024 جىلى بالالاردىڭ مەكتەپكە دەيىنگى بىلىممەن جالپى قامتىلۋ كوەففيتسيەنتى 40,9%-دى قۇراعان. بۇل كورسەتكىش 2023 جىلمەن سالىستىرعاندا قالالىق جەردە 0,1%-عا, اۋىلدىق جەردە 0,5%-عا ارتقان.
مايرا مەلدەبەكوۆانىڭ ايتۋىنشا, 2028 جىلعا دەيىن 2-6 جاس ارالىعىنداعى بارلىق بالانى مەكتەپكە دەيىنگى بىلىممەن تولىق قامتۋ جوسپارلانىپ وتىر. بۇل رەتتە اتا-انالاردىڭ بالاباقشاعا دەگەن ناقتى سۇرانىسى باستى نازارعا الىنادى.
