سۋرەتتى تۇسىرگەن – ءالي عالىم
جوبا ىلە-الاتاۋ مەملەكەتتىك ۇلتتىق تابيعي پاركى اۋماعىنداعى ايۋساي شاتقالىندا باستاۋ الدى. ءىس-شاراعا ءماجىلىس سپيكەرى, «Amanat» پارتياسىنىڭ توراعاسى ەرلان قوشانوۆ, تۋريزم جانە سپورت ءمينيسترى ەربول مىرزابوسىنوۆ, الماتى قالاسىنىڭ اكىمى دارحان ساتىبالدى, الماتى وبلىسىنىڭ اكىمى مارات سۇلتانعازيەۆ, دەپۋتاتتار, ءماجىلىس جانىنداعى قوعامدىق پالاتا مۇشەلەرى, «Kaz Alpine Club» بەلسەندىلەرى, تۋريستىك, ەكولوگيالىق ۇيىمداردىڭ وكىلدەرى, «جاستار رۋحىنىڭ» بەلسەندىلەرى قاتىستى.
«بۇگىندە تۋريزم ەكونوميكالىق وسىمگە تىڭ سەرپىن بەرەتىن باعىتقا اينالىپ كەلەدى. تۋريزم – بۇل جاڭا «مۇناي». سوندىقتان مەملەكەت باسشىسى وسى سەكتوردى دامىتۋ قاجەت ەكەنىن ۇنەمى ايتىپ كەلەدى. پرەزيدەنت جۇرگىزىپ جاتقان ىشكى جانە سىرتقى سىندارلى ساياسات ارقىلى ەلىمىزدە بەيبىتشىلىك پەن تۇراقتىلىق, كورشىلەس مەملەكەتتەرمەن دوستىق قارىم-قاتىناس ورنادى. ناتيجەسىندە, شەتەلدىك تۋريستەر حالقىمىزدىڭ قوناقجايلىلىعىن جاقسى بىلەدى جانە قازاقستانعا ەرەكشە ىقىلاسپەن كەلەدى. بۇگىنگى «الاتاۋ اماناتى» جوباسى وتاندىق ءتۋريزمدى دامىتۋ باعىتىندا جاسالعان تاعى ءبىر ماڭىزدى ءارى جۇيەلى قادام ەكەنىنە سەنىمدىمىن», دەدى ە.قوشانوۆ.
«الاتاۋ اماناتى» جوباسى شارىن شاتقالىنان باستاپ, تامعالى-تاس ارحەولوگيالىق كەشەنىنە دەيىنگى 1 200 شاقىرىمنان استام قاشىقتىقتى الىپ جاتاتىن ۇزىن-سونار ۇلتتىق سوقپاق سالۋدى كوزدەيدى. باعىت بويىندا 270 مىڭنان اسا تۇرعىنى بار 24 ينفراقۇرىلىم نىسانى مەن 20 ەلدى مەكەن ورنالاسقان. تۋريستەر ەتنواۋىلدارعا, گلەمپينگتەرگە, كەمپينگتەرگە, ۆيزيت-ورتالىقتارعا, قۇتقارۋ ستانسالارىنا, سونداي-اق گاسترونوميالىق جانە ەتنومادەني تۋريزم ورىندارىنا بارا الادى. بولاشاقتا مۇندا شىتىرمان وقيعاعا تولى ىشكى جانە حالىقارالىق تۋريزمگە ارنالعان تۇتاس ەكوجۇيە پايدا بولادى. «الاتاۋ اماناتى» جوباسى تۋريزم سالاسىن دامىتۋدى عانا ەمەس, اۋىل تۇرعىندارىنىڭ ەكونوميكالىق بەلسەندىلىگىن ارتتىرۋدى كوزدەيدى.
سوقپاق بويىنداعى نەگىزگى ايالدامالار قازىردىڭ وزىندە تۋريستىك تارتىمدىلىعى بار ورىندارعا اينالىپ جاتىر. وسىنداي نىسانداردىڭ قاتارىندا «ەسىك» مەملەكەتتىك تاريحي-مادەني مۋزەي-قورىعى, كوك جايلاۋ شاتقالى, بۋتاكوۆ شاتقالى, الما-اراسان ىستىق بۇلاقتارى, ۇلكەن الماتى كولى, VIII-XIII عاسىرلارداعى تالحيز قالاشىعى, سونداي-اق «Oi-Qaragai» تاۋ كۋرورتى بار.
جوبا ىسكە قوسىلعان كۇنى قاتىسۋشىلار «تازا قازاقستان» جالپىۇلتتىق اكتسياسى اياسىندا تاۋدا قوقىس جيناپ, پلوگگينگ – ەكولوگيالىق ءىس-شارا وتكىزدى.
«الاتاۋ اماناتى» جوباسىن ءبىر جارىم جىلدا جۇزەگە اسىرۋ كوزدەلگەن. ماجىلىستەگى «Amanat» پارتياسى فراكتسياسى ساراپشىلارمەن بىرلەسىپ, جوباعا زاڭنامالىق قولداۋ كورسەتەدى. تۋريستىك سوقپاقتاردى قۇقىقتىق تۇرعىدا رەتتەيتىن بازا قۇرىلادى, سونداي-اق ولاردى جوبالاۋ مەن اباتتاندىرۋدىڭ بىرىڭعاي ەرەجەلەرى ازىرلەنەدى. بولاشاقتا شىتىرمان وقيعاعا تولى ءتۋريزمدى دامىتۋدىڭ وسى ءتاسىلىن ەل اۋماعىندا كەڭىنەن قولدانۋ جوسپارلانىپ وتىر.
