فوتو: اۋىل شارۋاشىلىعى مينيسترلىگى
بۇگىندە قازاقستاننىڭ ۆەتەريناريالىق قىزمەتىندە 15 مىڭعا جۋىق بىلىكتى مامان ەڭبەك ەتىپ ءجۇر. ولاردىڭ ارقايسىسى اگروونەركاسىپتىك كەشەندى دامىتۋعا, ەكسپورتتىق الەۋەتتى ارتتىرۋعا جانە اۋىلدىق اۋماقتاردىڭ ءال-اۋقاتىن جاقسارتۋعا ەلەۋلى ۇلەس قوسىپ كەلەدى.
اۋىل شارۋاشىلىعى ءمينيسترى ايداربەك ساپاروۆ ۆەتەريناريالىق قىزمەتتىڭ ەل ءۇشىن ستراتەگيالىق ماڭىزىن اتاپ ءوتتى.
«ۆەتەريناريا سالاسىندا جۇمىس ىستەۋ – جوعارى بىلىكتىلىكتى, جاۋاپكەرشىلىكتى جانە ىسكە دەگەن ادالدىقتى تالاپ ەتەدى. سىزدەردىڭ ەڭبەكتەرىڭىزدىڭ ارقاسىندا جانۋارلاردىڭ دەنساۋلىعى, ازىق-ت ۇلىك قاۋىپسىزدىگى جانە اۋىل شارۋاشىلىعى ءوندىرىسىنىڭ تۇراقتىلىعى قامتاماسىز ەتىلەدى. بەكەر ايتىلماعان: دارىگەر ادامدى ەمدەسە, ۆەتەرينار – ادامزاتتى ەمدەيدى. بۇل سوزدەر ماماندىقتارىڭىزدىڭ ماڭىزىن ايقىن كورسەتەدى.
مەملەكەت باسشىسى ۆەتەريناريالىق قاۋىپسىزدىك جۇيەسىن جاڭعىرتۋعا ەرەكشە كوڭىل ءبولىپ وتىر. ۇكىمەت ينفراقۇرىلىمدى نىعايتۋ, ەڭ زاماناۋي جابدىقتار ساتىپ الۋ, تسيفرلىق مونيتورينگ قۇرالدارىن ەنگىزۋ باعىتىندا جۇمىس جۇرگىزىپ جاتىر. قىسقا مەرزىم ىشىندە مامانداردىڭ ەڭبەكاقىسى ەكى رەت كوتەرىلدى. بارلىق قابىلدانعان شارالار جۇيەنىڭ تيىمدىلىگىن ارتتىرۋعا باعىتتالعان», دەدى مينيستر.
ءىس-شارا اياسىندا مەملەكەتتىك جانە سالالىق ماراپاتتار تابىستالدى: 5 ادام اۋىل شارۋاشىلىعى ءمينيسترىنىڭ «قۇرمەت» گراموتاسىمەن ماراپاتتالسا, 14 مامانعا «اۋىل شارۋاشىلىعى سالاسىنىڭ ۇزدىگى» توسبەلگىسى, 3 سالا ارداگەرىنە «ەڭبەك ارداگەرى» مەدالى تابىس ەتىلدى. جالپى, وڭىرلەردە 160 قىزمەتكەر مەن ارداگەردىڭ ەڭبەگى ەلەندى.
وڭىرلىك ۆەتەريناريالىق بولىمشەلەرگە قىزمەتتىك اۆتوكولىكتەردىڭ كىلتتەرى تابىس ەتىلدى – بارلىعى 93 بىرلىك ارنايى تەحنيكا بەرىلدى.
ءىس-شارا قاتىسۋشىلارى رەسپۋبليكالىق ۆەتەريناريالىق زەرتحانانىڭ جۇمىسىمەن دە تانىستى.
