فوتوkfh: ەكولوگيا جانە تابيعي رەسۋرستار مينيسترلىگى
مينيستر قازالى قالاسىندا ورنالاسقان, 2024 جىلعى قاراشادا پايدالانۋعا بەرىلگەن ورمان تۇقىمباعىن ارالادى. تۇقىمباقتىڭ جالپى اۋماعى 33 گەكتار, ونىڭ ىشىندە وندىرىستىك الاڭى 10 گەكتار. بۇل جەردە سەكسەۋىل تۇقىمدارى سەبىلىپ, ناتيجەسىندە ارال تەڭىزىنىڭ قۇرعاعان تابانىنا وتىرعىزۋ ءۇشىن 3 ميلليون ستاندارتتى كوشەت الۋ جوسپارلانىپ وتىر. 2023 جىلى وتىرعىزىلعان, جالپى كولەمى 4 مىڭ گەكتاردى قۇرايتىن ەكپەلەر قارالدى. ەكپەلەر عىلىمي ۇسىنىمدارعا سايكەس جاسالىنىپ, كەلەسى وتىرعىزۋ سىزباسى قولدانىلدى: قاتار ارالىعىنىڭ ەنى 4 مەتر, قاتار ىشىندەگى ارالىق 2 مەتر, جولاق اراسىنداعى قاشىقتىق 30-35 مەتر. وتىرعىزۋ جۇمىستارى ستاندارتتى قارا سەكسەۋىلدىڭ كوشەتتەرىمەن جۇرگىزىلدى. قازىرگى ۋاقىتتا ەكپەلەردىڭ جاي-كۇيى قاناعاتتانارلىق دەپ باعالانادى.
بيىل 9 شىلدەدە وتىرعىزىلعان, جالپى اۋماعى 11,8 مىڭ گەكتاردى قۇرايتىن ەكپەلەر قارالدى. اتالعان جۇمىستار بيىلعى ناۋرىز ايىندا قازاق-فرانتسۋز بىرلەسكەن كاسىپورنى «كاتكو» قاراجاتى ەسەبىنەن جۇرگىزىلىپ, مۇندا دا ۇقساس وتىرعىزۋ سىزباسى قولدانىلعان, ال ەكپەلەردىڭ جاي-كۇيى جاقسى دەپ باعالانىپ وتىر.
سونداي-اق, مينيستر ارال تەڭىزىنىڭ قۇرعاعان تابانىندا ورنالاسقان تۇقىمباق قۇرىلىسىنىڭ بارىسىمەن تانىستى. قازىرگى ۋاقىتتا تۇقىمباق سۋعارۋ ماقساتىندا ۇڭعىمادا بۇرعىلاۋ جۇمىستارى جۇرگىزىلىپ جاتىر, قىزمەتكەرلەرگە ارنالعان مودۋلدىك كونتەينەرلەر جەتكىزىلدى. جۇمىستار بەلگىلەنگەن مەرزىمگە ساي ورىندالىپ جاتىر.
اتالعان تۇقىمباق اريدتىك (قۇرعاق) جاعدايلارعا جاقسى بەيىمدەلگەن كوشەت ماتەريالىن وسىرۋگە جانە تاسىمالداۋ شىعىندارىن ازايتۋعا مۇمكىندىك بەرەدى. تۇقىمباقتىڭ جالپى اۋدانى 15 گەكتاردى قۇرايدى, ال وندىرىستىك قۋاتتىلىعى جىلىنا 1,5 ميلليون دانا كوشەت وسىرۋگە جەتەدى.
ساپار بارىسىندا ە.نىسانباەۆ عىلىمي مامانداردىڭ وكىلدەرىمەن كەزدەستى. عالىمدارمەن بىرگە ارال تەڭىزىنىڭ قۇرعاعان تابانىندا ورمان ءوسىرۋ اگروتەحنيكاسىن جەتىلدىرۋ جانە وتىرعىزىلعان ەكپەلەردىڭ جەرسىنۋ دەڭگەيىن ارتتىرۋ ماسەلەلەرى تالقىلاندى.
ايتا كەتكەن ءجون, مينيستر ە.نىسانباەۆتىڭ باستاماسىمەن ورمان-مەليوراتسيا جۇمىستارىنا تۇراقتى عىلىمي سۇيەمەلدەۋ جۇرگىزۋ ماقساتىندا قىزىلوردا قالاسىندا قازوشعزي فيليالى قۇرىلعان. قازىرگى ۋاقىتتا وندا 2 عىلىمي قىزمەتكەر تۇراقتى نەگىزدە جۇمىس ىستەپ جاتىر.
سونىمەن قاتار, اتقارىلعان جۇمىستاردىڭ تۇراقتىلىعىن قامتاماسىز ەتۋ, سونداي-اق قۇرىلعان ەكپەلەردى قورعاۋ جانە ساقتاۋ ماقساتىندا ارال ورمان شارۋاشىلىعى مەكەمەسى بازاسىندا «ارال ورمانى» مەملەكەتتىك ورمان تابيعي رەزەرۆاتىن قۇرۋ ارقىلى ولارعا ەرەكشە قورعالاتىن اۋماق مارتەبەسىن بەرۋ جوسپارلانىپ جاتىر.
