جاقىندا بۇل اۋقىمدى جيىن اقش-تىڭ فلوريدا شتاتىنداعى ورلاندو قالاسىندا ءوتتى. وعان جان-جاقتان جەڭىمپازدار جينالدى. ءبىزدىڭ وقۋشىلار تانىستىرىلىمدا ءوز جوبالارىن جاقسى اشىپ كورسەتە ءبىلدى. اسىرەسە جوبانىڭ عىلىميلىعى مەن تەرەڭ فيلوسوفياسى قازىلار مۇشەلەرىن ۇلكەن اسەرگە قالدىردى. قازىلار قۇرامى دا ولقى ەمەس. ولار «NASA» ينجەنەرلەرى, استروفيزيكتەر, زەرتتەۋشىلەر مەن ءار ەلدەن كەلگەن بەدەلدى بيزنەسمەندەردەن قۇرالعان.
وقۋشىلار جاساعان جوبا «YURT» دەپ اتالادى. بۇل اتاۋ قازاقتىڭ كيىز ءۇي قۇرمەتىنە قويىلعان. ءبىر جاعىنان, كيىز ءۇي – حالقىمىز ءۇشىن كيەلى دۇنيە. رامىزدىك ءمانى دە زور.
ايتا كەتەيىك, «YURT» جوباسى جەردەگىدەي تارتىلىس كۇشى بار, 30 مىڭ ادام ۇزاق ۋاقىت ءومىر سۇرە الاتىن اۆتونومدى وربيتالىق ستانسا رەتىندە ازىرلەنگەن. جوباعا جابىق ەكوجۇيەلەر, جەر مەن باسقا عالامشار اراسىنداعى لوگيستيكالىق بايلانىس, سونداي-اق تۇراقتى ەنەرگەتيكا مەن رەسۋرستىق ينفراقۇرىلىم كىرگەن.
«ەلىمىز عارىش قاۋىمداستىعىنىڭ ءبىر بولىگى سانالادى. سونىمەن قاتار وسى باعىتتاعى عىلىمي دامۋ جۇمىستارىن ۇزبەي جالعاستىرىپ كەلەدى. ءبىز جاساعان ستانسانىڭ دا ءوز ەرەكشەلىگى بار. بۇل جوبا دا ءبىر كۇنى ىسكە اسار دەپ سەنەمىز. ەڭ ماڭىزدىسى – عارىش سالاسى تۋرالى يدەيالارىمىزدى الەممەن بولىسكەنىمىزگە قۋانىشتىمىز», دەيدى جوبا اۆتورلارى.
تانىستىرىلىم بارىسىندا وقۋشىلار ءوز جوبالارى جايىندا قىزىقتى بايانداما جاسادى. وعان «International Space Elevator Consortium» ۇيىمىنىڭ باس ساۋلەتشىسى, دوكتور پيتەر ا.سۋون ءتانتى بولدى. ول ءبىزدىڭ بالالاردىڭ جوعارى دەڭگەيدەگى دايىندىعى مەن كۇردەلى تەحنيكالىق تاقىرىپتارعا ىنتاسى ەرەكشە ەكەنىن اتاپ ءوتتى.
