وبلىس اكىمىنىڭ ورىنباسارى ءجۇسىپ جۇماعۇلوۆ ءمالىم ەتكەندەي, بۇگىندە وبلىستا 463 ۇەۇ تىركەلگەن, ونىڭ 80-ءى اۋىلدىق ەلدى مەكەندەردە جۇمىس ىستەيدى. 15 قوعامدىق كەڭەس بار.
«بۇل ۇيىمدار الەۋمەتتىك قورعاۋدان باستاپ ءبىلىم, دەنساۋلىق, ەكولوگيا, جاستار ساياساتى, قۇقىق قورعاۋعا قاتىستى قىزمەتتەردى اتقارادى. بيىل جەرگىلىكتى بيلىك ۇسىنىلعان 126 جوبانى قارجىلاندىرۋعا 453 ملن تەڭگە قاراجات ءبولدى», دەدى ول.
سونىمەن قاتار سپيكەر قوعامدا ادىلەتتىلىك قاعيدالارىن قالىپتاستىراتىن ورتاق قۇندىلىقتار جونىندە ايتتى.
«قوعام مەن ازاماتتىق سەكتوردىڭ قاتىسۋىمەن عانا جوعارى ساپاعا قول جەتكىزۋگە بولاتىن تازالىق, كوشە ءتارتىبى, اۋلالار بەلسەندىلىگى, ۇلتتىق قۇندىلىقتاردى باعالاۋ, پاتريوتتىق تاربيەنى جانداندىرۋ, ۇلكەندەردىڭ وزىق تاجىريبەسىن پايدالانۋ سياقتى ىستەردى بىلىكتىلىكپەن قولعا الساق, ءتيىستى ناتيجەگە قول جەتكىزە الامىز. سونداي وزىق تاجىريبەنىڭ ءبىرى جاقىندا ەسىل اۋدانىنداعى ەڭبەك اۋىلىندا قولعا الىندى. تۇرعىندار الكوگولدى ىشىمدىكتەن جاپپاي باس تارتۋ تۋرالى باستاما كوتەرىپ, ونى چەللەندج ارقىلى تاراتىپ ءجۇر. بۇگىندە وبلىستىڭ 18 اۋىلى باستامانى قولداپ وتىر», دەدى ج.جۇماعۇلوۆ.
قازىردە كۇن ءتارتىبىنىڭ الدىڭعى قاتارىندا تۇرعان «زاڭ جانە ءتارتىپ» قاعيداتى قوعام دەرتىنىڭ الدىن الۋعا, سونىڭ ىشىندە تۇرمىستىق زورلىق-زومبىلىق, ۆانداليزم, ەسىرتكى تاراتۋشىلىق پەن لۋدومانيانى بولدىرماۋعا باعىتتالعان. بۇل رەتتە الينا ورلوۆانىڭ تۇرمىستىق زورلىق-زومبىلىققا قارسى كۇرەسپەن اينالىساتىن «ايەلدەردى قولداۋ ورتالىعىنىڭ» جۇمىسى اتاپ ءوتىلدى.
مادەنيەت جانە اقپارات ۆيتسە-ءمينيسترى ايزادا قۇرمانوۆا سولتۇستىك قازاقستان وبلىسى ۇەۇ جۇمىسىنا قاناعاتتانارلىق باعا بەردى.
«قازىر ۇەۇ جۇمىستارىنا ۇكىمەت قاتتى كوڭىل ءبولىپ وتىر. پرەزيدەنت تاپسىرماسىمەن زاڭناما جەتىلدىرىلدى. اسىرەسە الەۋمەتتىك ماڭىزى بار جوبالاردى قولداۋ ارتىپ كەلەدى», دەدى ا.قۇرمانوۆا.
«جەرگىلىكتى ءوزىن-ءوزى باسقارۋ ينستيتۋتىن دامىتۋ» جەكەمەنشىك مەكەمەسىنىڭ توراعاسى, سولتۇستىك قازاقستاندا ازاماتتىق اليانستىڭ قۇرىلۋىنىڭ باستاۋ كوزىندە بولعان سەرگەي حۋدياكوۆ وبلىستاعى ۇەۇ قۇرىلۋ تاريحىنا تەرەڭنەن توقتالىپ ءوتتى.
«سەنىمەن بولاشاق» رقۇ اۆتورى, قۇرىلتايشىسى نۇربەك اسانوۆ بايانداماسىندا وتباسىنداعى سىيلاستىق پەن بىرلىك بارلىق جاقسىلىقتىڭ باستاۋى ەكەنىن العا تارتا كەلىپ, ەلىمىزدىڭ 16 وڭىرىندە بالا تاربيەسىنە ەرەكشە ءمان بەرەتىن ۇەۇ قۇرعاندارىن مالىمدەدى. «وتباسىندا مەيىرىم كورمەگەن بالادان, الەۋمەتتىك جەلىدە ۇزدىكسىز كورسەتىلەتىن زورلىق-زومبىلىقتان كوز المايتىن جاسوسپىرىمنەن جاقسى ازامات شىقپايدى. سول تۇرعىدا اۋلالىق ۇيىمدار, فۋتبول كوماندالارىن قۇرىپ, جارىستار وتكىزىپ جاتىرمىز», دەدى ول.
جالپى وتىرىس اياقتالعان سوڭ, فورۋم جۇمىسى پانەلدىك سەسسيالاردا جالعاستى. قورىتىندىسىندا سولتۇستىك قازاقستاننىڭ 11 ۇەۇ-سى ۇزدىك دەپ تانىلىپ, وبلىس اكىمى اتىنان ماراپاتتار تابىستالدى. سونىمەن قاتار «قازاقستاننىڭ ازاماتتىق اليانسى» قاۋىمداستىعىنىڭ پرەزيدەنتى بانۋ نۇرعازيەۆا 11 قاتىسۋشىنى اليانستىڭ 20 جىلدىعىنا وراي ديپلومدارمەن ماراپاتتادى.
سولتۇستىك قازاقستان وبلىسى
