سۋرەتتى تۇسىرگەن – اۆتور
بۇل شارا ءتۋريزمنىڭ تىڭ باستاماسى دەسە دە بولادى. سوناۋ كەڭەس وكىمەتى تۇسىندا اۋدانداردى بايلانىستىرىپ تۇرعان سۋ جولى توقتاعانىمەن, وسكەمەندەگى وزەن ۆوكزالى ماڭى ماڭىزىن جويعان ەمەس. بەرتىن گەس پەن سامال پاركى اراسىندا كەمە ءجۇزىپ, قالا تۇرعىندارى مەن قوناقتارىنا قۋانىش سىيلادى. كۇننىڭ اپتاپ ىستىعىندا سۋدىڭ سالقىن سامالىمەن سەرۋەندەۋ دە تاپتىرماس دەمالىس.
– جاز شىقسا, بالا-شاعامىزبەن قايىققا ءمىنىپ, اناۋ گەس-كە دەيىن قىدىرىپ قايتامىز. سۋلى قالادا تۇرعاندا مۇنداي سەرۋەننىڭ بولۋى زاڭدى دا. ايتپەسە, جاساندى وزەننەن پايدا تاۋىپ وتىرعان قالالاردى دا بىلەمىز. ونىڭ قاسىندا بىزدىكى قولدا بار بايلىق. بۇرىندارى وسىناۋ وزەن ۆوكزالىنان سەمەيگە, ۇلكەن نارىنعا دا قاتىناپ تۇردىق, – دەيدى وسكەمەن قالاسىنىڭ تۇرعىنى ساقىپ باسەنوۆا.
ۇلتتىق دومبىرا جانە سۋ شارۋاشىلىعى قىزمەتكەرلەرى كۇنى قارساڭىندا كەمەلەر شەرۋى ۇيىمداستىرىلىپ, تۋريزمگە سەرپىن بەرگەندەي بولدى. شاراعا قاتىسقان قوناقتار قايىققا ءمىنىپ, سەرۋەندەپ قايتتى. ايتۋلى شەرۋگە وبلىس باسشىلىعى دا ارنايى كەلىپ قاتىستى.
– سۋ رەسۋرستارىنا باي شىعىس قازاقستاندا كەمە قاتىناسى قايتا جاندانىپ, سەرپىندى دامىپ كەلەدى. بۇگىنگى اۋقىمدى شارا – سونىڭ دالەلى. كەلەر جىلى ءبىز بۇل شەرۋگە وزگە وبلىستار مەن شەكارا ماڭى مەملەكەتتەرىنەن دە قاتىسۋشىلاردى شاقىرامىز. ويتكەنى ەرتىس وزەنى مەن ونىڭ اكۆاتورياسى بۇعان تولىق مۇمكىندىك بەرەدى, – دەدى وبلىس اكىمى ن.ساقتاعانوۆ.
وزەن ۆوكزالى ايلاعىندا وتكەن مەرەكەلىك ءىس-شاراعا وبلىس ورتالىعىنىڭ تۇرعىندارى, ارداگەرلەر مەن ەتنومادەني بىرلەستىكتەردىڭ وكىلدەرى دە قاتىستى. جاسوسپىرىمدەر قوڭىر دومبىرادان كۇي توگىپ, انشىلەر قالا كوگىندە ءان اۋەلەتتى. ءوڭىر باسشىسى كەلەسى جىلى گەس ماڭىندا ءىرى كەمەلەر شەرۋىن وتكىزۋگە دايىندىق جۇمىسىن باستاۋدى تاپسىردى.
وسكەمەن
