فوتو: new.tlt.ru
اتىراۋ وبلىستىق پوليتسيا دەپارتامەنتىنىڭ ءباسپاسوز قىزمەتىنەن ءمالىم ەتكەندەي, وقيعا 7 شىلدەدە ساعات 19:00 شاماسىندا بولعان.
«قۇلسارى قالاسىندا قوعامدىق اۆتوكولىك پەن موپەد سوقتىعىستى. جول اپاتىنىڭ سالدارىنان موپەدتىڭ رۋلىندە وتىرعان 2012 جىلعى ءجاسوسپىرىم اۋرۋحاناعا جەتكىزىلدى. ءجاسوسپىرىم العان دەنە جاراقاتتارىنىڭ سالدارىنان قايتىس بولدى. قازىر اتالعان جول-كولىك وقيعاسىنا قاتىستى قىلمىستىق ءىس تىركەلدى», دەپ حابارلادى دەپارتامەنتتىڭ ءباسپاسوز قىزمەتى.
جىلىوي اۋداندىق پوليتسيا ءبولىمىنىڭ قىزمەتكەرلەرى كەشەندى تەرگەۋ امالدارى جۇرگىزىلىپ جاتىر. وزگە اقپارات تەرگەۋ مۇددەسىنە سايكەس جاريالاۋعا جاتپايدى.
«اتا-انالار مەن كولىك جۇرگىزۋشىلەرىنە جول قوزعالىسى ەرەجەلەرىن ساقتاۋعا, اسىرەسە, جاسوسپىرىمدەردىڭ قاۋىپسىزدىگىنە باسا نازار اۋدارۋدى ەسكەرتەمىز. اسىرەسە, موپەد, سكۋتەر جانە وزگە كولىك قۇرالدارىن جۇرگىزۋ كەزىندە قاۋىپسىزدىك تالاپتارىن قاتاڭ ساقتاۋ – ادام ءومىرىنىڭ باستى كەپىلى. كامەلەتكە تولماعان بالالارعا ارنايى قورعانىش قۇرالدارىنسىز جانە ءتيىستى جۇرگىزۋشى قۇجاتىنسىز جولعا شىعۋعا قاتاڭ تىيىم سالىنادى», دەپ ءمالىم ەتتى دەپارتامەنتتىڭ ءباسپاسوز قىزمەتى.
