«اەس پايدالانۋ ءۇشىن شامامەن 2 000 ادام, ونىڭ ىشىندە يادرولىق ماماندىق بويىنشا 400 ادام قاجەت. ال قالعاندارى — بىزدە جۇمىس ىستەپ تۇرعان كومىر جانە گاز ەلەكتر ستانسالارىندا ەڭبەك ەتەتىن بەيىندى-تەحنيكالىق ماماندار. يادرولىق ماماندىقتار بويىنشا قىزمەتكەرلەردى دايىنداۋعا كەلەر بولساق, قازىرگى ۋاقىتتا فيزيكامەن, ەنەرگەتيكا جانە ەلەكترتەحنيكاسىمەن بايلانىستى 18 ءبىلىم باعدارلاماسى بويىنشا بىلىكتى كادرلاردى دايىنداۋ قارقىندى جۇرگىزىلىپ جاتىر», دەدى تەحنيكالىق ۋنيۆەرسيتەت باسشىلىعى.
ۋنيۆەرسيتەت تاراتقان مالىمەتكە سۇيەنسەك, وتاندىق د. سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىندە, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە, ءال-فارابي اتىنداعى قازاق ۇلتتىق ۋنيۆەرسيتەتىندە, سونىمەن قاتار يادرولىق تەحنولوگيا ماماندانعان شەتەلدىك جەتەكشى جوو-لاردا ماماندار دايارلاۋ قولعا الىنعان. يادرولىق ماماندىقتار بويىنشا ءبىلىم گرانتتار سانىن ارتتىرۋ قاجەتتىلىككە قاراي جۇزەگە اسىرىلادى. سونىمەن قاتار ءبىلىم الىپ جاتقان جاس ماماندار جۇمىس ىستەپ تۇرعان اەس-تەردە تاجىريبە جيناقتاپ, تاعلىمدامادان وتەدى.
