ورتالىق قيىن ومىرلىك جاعدايعا تاپ بولعان ايەلدەر مەن بالالارعا جان-جاقتى كومەك كورسەتەدى. الەۋمەتتىك بەيىمدەۋ, قۇجاتتارىن قالپىنا كەلتىرۋ, جۇمىسقا ورنالاسۋعا جاردەمدەسۋ, مەديتسينالىق تەكسەرۋدەن ءوتۋ, جاردەماقىلاردى رەسىمدەۋ, قاجەت بولعان جاعدايدا مۇگەدەكتىك بەرۋ سىندى كەڭ اۋقىمدى قولداۋ كورسەتىلەدى. سونداي-اق ورتالىق قاۋىپسىز باسپانامەن, بەس مەزگىل تاماقپەن, بىلىكتى پسيحولوگيالىق كومەكپەن, بالالاردى مەكتەپتەر مەن مەكتەپكە دەيىنگى مەكەمەلەرمەن قامتاماسىز ەتەدى.
كەزدەسۋ بارىسىندا اجار ساعاندىقوۆا ورتالىقتىڭ تۇرمىستىق جاعدايىن تەكسەرىپ, قىزمەتكەرلەرمەن جانە قامقورلىققا الىنعاندارمەن اڭگىمەلەسىپ, مامانداردىڭ كوپتەپ تارتىلعانىن جانە كاسىبي دەڭگەيىن اتاپ ءوتتى.
— وتكەن جىلى قابىلدانعان ايەلدەردىڭ قۇقىقتارى مەن بالالاردىڭ قاۋىپسىزدىگىن قورعاۋ تۋرالى زاڭ قازىردىڭ وزىندە ناقتى ناتيجە بەرىپ جاتىر. ايەلدەر كومەككە ءجيى جۇگىنە باستادى, زورلىق-زومبىلىق جاعدايلارىنا جاۋاپ بەرىپ قانا قويماي, ولاردىڭ الدىن الۋعا دا مۇمكىندىك تۋدى. ءاربىر ايەل ءوزىنىڭ قاۋىپسىز ەكەنىن جانە مەملەكەتتىڭ قولداۋىن سەزىنۋى ماڭىزدى, - دەدى دەپۋتات.
تالقىلاۋ بارىسىندا كوتەرىلگەن ماسەلەلەردىڭ قاتارىندا عيماراتتى كۇردەلى جوندەۋدەن وتكىزۋ, مۇمكىندىگى شەكتەۋلى جاندارعا قولايلى جاعداي جاساۋ, بالالار ويىن الاڭىن سالۋ, ايەلدەر مەن بالالاردى مەديتسينالىق تەكسەرۋدەن وتكىزۋ, الەۋمەتتىك شارالارعا الىپ بارۋ ءۇشىن قوسىمشا كولىكپەن قامتاماسىز ەتۋ ماسەلەلەرى ايتىلدى.
اجار ساعاندىقوۆا ايتىلعان بارلىق ۇسىنىس پەن ماسەلەلەر ەسكەرىلەتىنىن جانە داعدارىس ورتالىقتارى جەلىسىن ودان ءارى دامىتۋ مەن تۇرمىستىق زورلىق-زومبىلىقتىڭ جۇيەلى الدىن الۋدىڭ ماڭىزدىلىعىن اتاپ ءوتتى.
– داعدارىس ورتالىقتارى جاي عانا شۇعىل كومەك كورسەتەتىن ورىن ەمەس, جاڭا, قاۋىپسىز ومىرگە جول باستايتىن ورتاعا اينالۋى كەرەك. مۇنداي ينستيتۋتتاردى قولداۋ – جسدپ فراكتسياسىنىڭ باسىم باعىتتارىنىڭ ءبىرى, - دەدى اجار ساعاندىقوۆا.
