اناتولي يىعىنا ىلگەن قارا شاعىن سومكەسىن كورسەتىپ, وندا جاساندى جۇرەكتىڭ باتارەيالارى ساقتالاتىنىن ايتادى. سومكەدەن شىققان ەلەكتر سىمى كيىمىنىڭ استىمەن جۇرەك تۇسىنا كەتەدى - ءدال سول جەردە جۇرەك جۇمىسىن رەتتەيتىن قۇرىلعى ورنالاسقان.
«مىنە, وسىنداي جۇيەلىك كونتروللەر ورناتىلعان, ول جۇرەكتەن دەرەك جينايدى. جۇرەك تۇسىندا (كورسەتىپ) كىشكەنتاي كومپيۋتەر تۇر, سول كونتروللەرگە اقپارات جىبەرەدى. ءبىر كەلى باتارەيانى ۇنەمى وزىممەن بىرگە الىپ جۇرەمىن. ءۇش جىلدان استى - ەڭ باستىسى, ءتىرىمىن!», - دەيدى اناتولي كۋزنەتسوۆ.
پاتسيەنتكە 20 جىلدان استام ۋاقىت بۇرىن جۇرەكتىڭ يشەميالىق اۋرۋى دياگنوزى قويىلعان. كەيىن ينفاركت جانە بىرنەشە كۇردەلى وتا جاساتقان. 2022 جىلى ەلوردالىق كارديوحيرۋرگتەر وعان اورتالىق قاقپاقشانىڭ بيولوگيالىق پروتەزى مەن سول جاق قارىنشانى قولدايتىن يمپلانت ورناتىپ بەردى. مۇنداي قۇرىلعىمەن ءومىر سۇرەتىن ادامعا كۇن سايىن جاياۋ ءجۇرۋ اۋاداي قاجەت. الايدا, ءاناتوليدىڭ وڭ جاق تىزەسى قاتتى اۋىراتىن.
«جۇرەگى اۋىراتىن ناۋقاس رەتىندە كۇن سايىن كەمى 4 شاقىرىم جاياۋ ءجۇرۋىم كەرەك. قوزعالىسسىز قالسام, جاعدايىم ناشارلاي باستايدى. تىزەمە وتا جاساي الاتىن دارىگەر ىزدەدىم. ءتۇرلى كونسيليۋم ءوتتى, بىراق ءبارى باس تارتىپ جاتتى. ءبىر جىلدان استام ۋاقىت تەك وتاعا الاتىن دارىگەردى ىزدەۋمەن ءوتتi. سودان الماتى №4 قالالىق اۋرۋحاناعا كەلىپ, ماناربەك عازيز ۇلىنا جولىقتىم. ول وتا جاساۋعا كەلىسىم بەردى. رەانيماتولوگپەن بىرگە مەنى قاراپ جۇرگەن ەلوردالىق كارديولوگتارمەن بىرلەسە ارەكەت ەتتى. ماۋسىمنىڭ 19-ى كۇنى وتا جاسالدى. بۇل وتە كۇردەلى وتانىڭ ءبىرى بولدى, ويتكەنى مەن ۇنەمى قان سۇيىلتاتىن ءدارى-دارمەك ىشەمىن - ول موتوردىڭ جۇمىسى ءۇشىن قاجەت. دارىگەرلەر قان كەتۋدەن قورىققان ەدى. بىراق ءبارى ساتىمەن بولىپ, كوپ قان جوعالتپادىم, جاعدايىم جاقسى. وتادان بەرى ون كۇنگە جۋىق ۋاقىت ءوتتى - جۇرە باستادىم. تولىق ساۋىعۋ ءۇشىن ءالى دە ۋاقىت كەرەك. ۇزاق ۋاقىت توسەكتە جاتقاننان كەيىن اقىرى ءوز بەتىممەن قوزعالا باستادىم. دارىگەرلەرگە راقمەت! №4 اۋرۋحانانىڭ بۇكىل ۇجىمىنا العىسىم شەكسىز. مۇنداعى ماماندار - ناعىز التىن قولدى ادامدار», - دەيدى رياسىز ريزاشىلىقپەن اناتولي كۋزنەتسوۆ.
ناۋقاس №4 قالالىق كلينيكالىق اۋرۋحاناسىنا تىزە بۋىنىنا بۇرىن ورناتىلعان ەندوپروتەزدىڭ اۋىرتىپ, قولايسىزدىق تۋىنداتقاندىقتان جۇگىنگەن. اۋرۋحانا ماماندارى بۇل جولى دا كۇردەلى جاعدايدى ەڭسەرىپ شىقتى.
«باستى قيىندىق - ونىڭ قاتار جۇرەتىن اۋىر پاتولوگيالارى ەدى: MyVal اورتالىق قاقپاقشا بيوپروتەزى, سوزىلمالى جۇرەك جەتكىلىكسىزدىگى, ارتەريالىق گيپەرتەنزيا, باۋىر مەن بۇيرەك قىزمەتىنىڭ بۇزىلىستارى جانە باسقا دا بىرقاتار كۇردەلى اۋرۋلار. وتا الدىندا تولىق كلينيكالىق جانە زەرتحانالىق تەكسەرۋ, مۋلتيديستسيپلينارلىق دايىندىق جۇرگىزىلدى. ناتيجەسىندە وتا ءساتتى ءوتتى. ەرتە وڭالتۋ كەزەڭىندە پاتسيەنت تاۋلىك بويى ارقتب-دە باقىلاۋدا بولدى. كەلەسى كۇنى-اق بەلسەندى وڭالتۋ باستالدى. بۇگىن ول اۋرۋحانادان ۇيگە شىقتى, جاعدايى جاقسى, كۇن سايىن ءوزىن جاقسى سەزىنە باستاعانىن ايتادى», - دەيدى الماتى №4 قالالىق كلينيكالىق اۋرۋحاناسى ەندوپروتەزدەۋ بولىمشەسىنىڭ مەڭگەرۋشىسى ماناربەك اۋباكىروۆ.
حيرۋرگيالىق وتانى تراۆماتولوگيا-ورتوپەديا بولىمشەسىنىڭ مەڭگەرۋشىسى, جوعارى ساناتتى ورتوپەد-دارىگەر مانات اۋباكىروۆ جاساسا, انەستەزيولوگيالىق سۇيەمەلدەۋدى ارقتب مەڭگەرۋشىسى, جوعارى ساناتتى دارىگەر ج. داۋلەتبەكوۆ قامتاماسىز ەتتى. ەمدەۋشى دارىگەر رەتىندە ورتوپەد-تراۆماتولوگ ج.وروزحان قوسىلدى. بۇل جاعداي - اسا جوعارى حيرۋرگيالىق قاۋىپكە قاراماستان الماتىلىق ماماندار كومانداسىنىڭ ۇيلەسىمدى جۇمىسىن پاش ەتتى.
«جاساندى جۇرەكپەن ءومىر ءسۇرۋ - مۇلدە بولەك جاعداي. كۇيەۋىم سۋعا تۇسە المايدى, جۋىنعانى - تەك دىمقىل شۇبەرەكپەن سۇرتىنۋدەن اسپايتۆن. قۇرىلعىنىڭ تۇتىگى بار, كۇن سايىن تاڭعىش اۋىستىرامىز. كۇندىز يىعىنان سومكە تۇسپەيدى, تۇندە - ستاتسيونارلىق قۇرىلعىعا جالعانادى. ءبىر جارىم جىل بويى تىزە اۋرۋىنان قاتتى قينالدى. بالداقپەن ارەڭ جۇرەتىن. جاتا بەرگەن سوڭ كوز الدىمدا قارتايا باستادى. ءبىز بارماعان جەر قالمادى - ءبارى قورقىپ, باس تارتتى. بار بولعانى 1% مۇمكىندىك بەردى. بىراق ءبىز تاۋەكەلگە بەل بۋدىق. دارىگەرلەرگە: ء“بىز سىزدەرگە سەنەمىز!” - دەدىك. ءوز باسىم ولارعا 100% سەنىمدى بولدىم. جولداسىم امان قالاتىنىن ءبىلدىم», - دەيدى ناۋقاستىڭ جۇبايى ولگا كۋزنەتسوۆا.
