ۇلت رۋحىنىڭ ءۇنىن دومبىرا ارقىلى جەتكىزگەن, رۋحاني ساباقتاستىق پەن ءتول ونەردى ۇلىقتاۋعا باعىتتالعان مادەني وقيعا ەل ەسىندە قالدى. ايرىقشا ساتتە كاسىبي مۋزىكانتتار, مەكتەپ وقۋشىلارى مەن ستۋدەنتتەر, ونەرسۇيەر قاۋىم ءبىر مەزەتتە قوس كۇيدى ورىنداپ, بۇرىن-سوڭدى بولماعان مۋزىكالىق رەكورد ورناتتى. اتالعان جەتىستىك قازاقستان رەكوردتار كىتابىنىڭ باس رەداكتورى قايرات تازابەكوۆتىڭ قاتىسۋىمەن رەسمي تىركەلىپ, ارنايى سەرتيفيكات جەتىسۋ وبلىسى اكىمدىگىنە تابىستالدى. بۇل – جەتىسۋ جۇرتىنىڭ عانا ەمەس, تۇتاس قازاق حالقىنىڭ رۋحاني ومىرىندەگى ەلەۋلى جەتىستىك رەتىندە باعالاندى.
«بۇل كۇن – جەتىسۋ ءوڭىرى ءۇشىن ۇلكەن ماقتانىش. سەبەبى باستاما تەك ونەر مەرەكەسى ەمەس, ۇلتتىق بىرلىك پەن ورتاق مۇرات توڭىرەگىندە توعىسقان مىڭداعان ادامنىڭ جۇرەك ءلۇپىلىن ءبىر ارناعا توعىستىرعان رۋحاني جاڭعىرۋ كورىنىسى بولدى. فلەشموبقا وبلىستىڭ بارلىق اۋداندارى مەن اۋىلدارىنان, ءتۇرلى باسقارما مەن مەكەمەدەن كەلگەن قاتىسۋشىلار شىن ىقىلاسپەن اتسالىسىپ, دومبىرا ارقىلى ەل تاريحىنا ءوز ۇندەرىن قوستى», دەيدى وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى قۋانىش سۇلتانوۆ.
سونىمەن قاتار جەتىسۋ جەرىنىڭ تابيعي-تاريحي كورنەكى ورىندارىندا تۇسىرىلگەن, جەتى كۇيشى ورىنداعان «باقتىبايدىڭ اۋەنى» اتتى بەينەبايان جۇرتشىلىق نازارىنا ۇسىنىلىپ, فلەشموبپەن بىرىكتىرىلگەن مۋزىكالىق-ۆيزۋالدى تۋىندى رەتىندە كوپشىلىكتىڭ كوڭىلىنەن شىقتى. بۇل جوبا ءداستۇر مەن زاماناۋي ونەردىڭ جاراسىمدى ۇندەسۋىن ايشىقتاعان ەرەكشە مادەني باستاماعا اينالدى.
ءىس-شارا بارىسىندا قازاقتىڭ جىراۋلىق-جىرشىلىق ونەرىنىڭ كورنەكتى وكىلى باقتىباي جولبارىس ۇلىنىڭ 190 جىلدىعىنا وراي «باقتىبايدىڭ اۋەنى» جانە بەلگىلى كۇيشى-كومپوزيتور ءابدىمومىن جەلدىبايدىڭ «ەركە سىلقىم» اتتى تۋىندىلارى ورىندالدى.
