شارباقتى اۋدانى الەكساندروۆكا اۋىلدىق وكرۋگىنىڭ اۋماعىندا قۇرعاپ تۇرعان دالا ءشوبى ورتەنگەن. شۇعىل قىزمەتتەردىڭ جەدەل ءىس-قيمىلدارى مەن بارلىق تارتىلعان قۇرىلىمداردىڭ ءوزارا ۇيلەسىمدى ءىس-قيمىلىنىڭ ارقاسىندا ءورتتىڭ ورمان القابى مەن تۇرعىن ۇيلەرگە وتۋىنە جول بەرىلمەدى.
- دالالى جەردە ءورت شىعىپ, ىستىققا جانە جەلدى اۋا رايىنا بايلانىستى جالىننىڭ ايتارلىقتاي اۋماققا تارالۋ قاۋپى تۋىندادى. وقيعا ورنىنا پاۆلودار وبلىسىنىڭ توتەنشە جاعدايلار دەپارتامەنتىنىڭ بولىمشەلەرى, جەرگىلىكتى اتقارۋشى ورگانداردىڭ ءورت ءسوندىرۋ بەكەتتەرىنىڭ قىزمەتكەرلەرى, ورمان قورعاۋ وكىلدەرى جىبەرىلدى, سونداي-اق «قازاۆياورمانقورعاۋ» رمقك اۆياتسيا كەزەكشىسىنىڭ ۇشۋى جۇزەگە اسىرىلدى.
قىسقا مەرزىمدە 100 شارشى مەتر جەرگە تارالعان ءورت وقشاۋلانىپ, جويىلدى. ءورت سوندىرۋشىلەردىڭ, جەرگىلىكتى اتقارۋشى ورگانداردىڭ جانە «ەرتىس ورمانى» رەزەرۆاتى ماماندارىنىڭ جەدەل قيمىلىنىڭ ارقاسىندا ءتىلسىز جاۋ ورمان القابىنا جەتپەي توقتاتىلدى جانە جاقىن ماڭداعى ەلدى مەكەندەرگە تونگەن قاۋىپ جويىلدى. وقيعاعا قۇرعاق ءشوپتى جاعۋ كەزىندە ءورت قاۋىپسىزدىگى ەرەجەلەرىنىڭ بۇزىلۋى سەبەپ بولعان. كىنالى ادام انىقتالىپ, اكىمشىلىك جاۋاپكەرشىلىككە تارتىلدى. 15 ايلىق ەسەپتىك كورسەتكىش مولشەرىندە ايىپپۇل تاعايىندالدى,-دەپ حابارلادى وڭىرلىك توتەنشە جاعدايلار دەپارتامەنتىنىڭ ءباسپاسوز قىزمەتىنەن.
توتەنشە جاعدايلار قىزمەتىنىڭ ماماندارى ىستىق اۋا رايى جانە ءورت قاۋپى جوعارى جاعدايلاردا وتقا ابايسىزدىق تانىتۋ قايعىلى سالدارعا سوقتىرۋى مۇمكىن ەكەنىن ەسكەرتىپ وتىر. ءورت قاۋىپسىزدىگى ەرەجەلەرىن ساقتاۋ - ءاربىر ازاماتتىڭ مىندەتى.
پاۆلودار وبلىسى
