دارىگەرلەر پويىزى ەڭ اۋەلى باتىس قازاقستان وبلىسىنىڭ شىڭعىرلاۋ ستانساسىنا ماۋسىمنىڭ 27-ءسى كۇنى ايالداعان ەدى. الەۋمەتتىك جوبا قازاقستان رەسپۋبليكاسى پرەزيدەنتى جانىنداعى ايەلدەر ءىسى جانە وتباسى-دەموگرافيا ساياساتى جونىندەگى ۇلتتىق كوميسسيا, «Samruk-Kazyna Trust» قورى جانە «سامۇرىق-قازىنا» كومپانيالار توبىنىڭ تاپسىرىسى بويىنشا قولعا الىنعان ەكەن.
پويىزدىڭ اعا دارىگەرى اسەمگۇل ساحانوۆانىڭ ايتۋىنشا, توپ قۇرامىندا ءتۇرلى ماماندىقتاعى 30 دارىگەر – تەراپەۆت, تراۆماتولوگ, كارديولوگ, ۋدز دارىگەرى, وتولارينگولوگ, نەۆروپاتولوگ, پەدياتر, اكۋشەر-گينەكولوگ, وكۋليست, ۋرولوگ-دارىگەر, دياگنوستيكا دارىگەرى, دياگنوستيكالىق دياگنوستيكا-دارىگەر, ستوماتولوگ-دارىگەر بار. پويىزداعى ساپالى قۇرال-جابدىق, قوندىرعىلار ناۋقاستى ءتۇرلى قاجەتتى تەكسپەرۋدەن وتكىزىپ, ناتيجەسىن تابان استىندا شىعارىپ بەرە الادى. ستانسا باسىنا كەلە المايتىن سىرقاتتاردىڭ ۇيىنە ءپورتاتيۆتى اپپاراتتاردى الىپ بارىپ, قاراۋ دا قاراستىرىلعان ەكەن.
12 951 ادام تۇراتىن شىڭعىرلاۋ اۋىلىندا «تەمىر جولداعى ەمحانا» 2 كۇن بولىپ, حالىققا تەگىن قىزمەت كورسەتتى. ودان كەيىن امانگەلدى بەكەتىندە ەكى كۇن ايالدادى.
«جىل سايىن وسى مەديتسينالىق بريگادانى كۇتەمىز: بۇل ءبىز ءۇشىن بىلىكتى مامانداردىڭ قىزمەتىن پايدالانۋدىڭ تاماشا مۇمكىندىگى. سەزىمتال, بىلىكتى دارىگەرلەر ۇجىمىنا العىسىمدى بىلدىرگىم كەلەدى», دەيدى شىڭعىرلاۋ اۋىلىنىڭ تۇرعىنى ەربولات اليەۆ.
پويىز قۇرامىندا دارىگەردەن بولەك, زاڭگەر مەن مەدياتور دا اۋىل تۇرعىندارىنا كومەك كورسەتىپ ءجۇر. ولار ەڭبەك داۋلارىن شەشۋ, الەۋمەتتىك تولەمدەر الۋ ءۇشىن ءوتىنىم بەرۋ, زاڭناما نورمالارىن ءتۇسىندىرۋ جانە ت.ب. ماسەلەدە كومەك كورسەتەدى, دەيدى پويىز مەدياتورى ش.شالعازينا.
1 شىلدە كۇنى تاسقالا اۋدانى اۋماعىنا جەتكەن دارىگەرلەر «سەميگلاۆىي مار» ستانساسىنا توقتادى. بۇل بەكەتتىڭ اينالاسىندا اۋداننىڭ بىرنەشە شاعىن ەلدى مەكەنى – دوستىق, باستاۋ, ىنتىماق اۋىلدارى ورنالاسقان.
بۇل جەردە دە جەرگىلىكتى تۇرعىندار مەن اتقارۋشى ورگاندار وكىلدەرى پويىز ۇجىمىن قۋانا قارسى الدى. بۇل كەزدەسۋگە باتىس قازاقستان وبلىسى اكىمىنىڭ ورىنباسارى, وبلىس اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا توراعاسى قايىرجان مەڭدىعاليەۆ ارنايى كەلىپ, جوبانى ۇيىمداستىرۋشىلارعا جانە ەلىمىزدىڭ دەنساۋلىق ساقتاۋ مينيسترلىگىنە العىس ايتتى.
«شالعاي ەلدى مەكەن تۇرعىندارىنىڭ ءومىرى مەن دەنساۋلىعىن ساقتاۋ, ولاردىڭ الەۋمەتتىك ءال-اۋقاتىن قامتاماسىز ەتۋ جولىندا بۇل جوبا وتە ماڭىزدى ءرول اتقارادى. ەلىمىزدىڭ ەڭ باستى بايلىعى – ادام جانە ونىڭ دەنساۋلىعى. سوندىقتان «سالاماتتى قازاقستان» پويىزىنىڭ ۇجىمىنا حالىقتىڭ اتىنان زور العىس ايتامىن», دەدى قايىرجان ەرمەك ۇلى.
