ۇكىمەت ۇشتوبەنىڭ جىلۋ جەلىلەرىنە قاراجات ءبولدى

30 مىڭ حالقى بار ۇشتوبە قالاسىن ورتالىقتاندىرىلعان جىلۋمەن قامتۋ «جىلىتۋ ورتالىعى» جشس-نىڭ ورتالىق قازاندىعى ارقىلى جۇزەگە اسىرىلادى. جىلۋ جەلىلەرىنىڭ جالپى ۇزىندىعى – 15,3 شاقىرىم.

2024 جىلى قالانىڭ جىلۋ جۇيەسىنىڭ قۋاتىن ارتتىرۋ ءۇشىن قۋاتى 12 گكال/ساعات بولاتىن بلوك-ءمودۋلدى گاز قازاندىعى ورناتىلدى. ونىڭ ءتيىمدى جۇمىسىن قامتاماسىز ەتۋ ءۇشىن ۇزىندىعى 1,7 شاقىرىم بولاتىن, توزۋ دەڭگەيى 50%-عا جەتكەن ماگيسترالدىق جىلۋ تراسساسىن جاڭعىرتۋ قاجەتتىلىگى تۋىندادى.

جوبانىڭ قۇنى 870 ملن تەڭگە, ونىڭ 70%-ى رەسپۋبليكالىق بيۋدجەتتەن جانە 30%-ى جەرگىلىكتى بيۋدجەتتەن قارجىلاندىرىلادى.

بۇگىندە جۇمىستاردىڭ 76%-ى اياقتالدى. 1,7 شاقىرىم جىلۋ جەلىلەرىنىڭ 1,3 شاقىرىمى تارتىلدى. وسى جىلدىڭ تامىز ايىنا قاراي رەكونسترۋكتسيالاۋدى تولىق اياقتاۋ جوسپارلانىپ وتىر.

جوبانى جۇزەگە اسىرۋ ناتيجەسىندە ۇشتوبە قالاسىنىڭ تۇرعىندارى 349 ابونەنت, ونىڭ ىشىندە 282 تۇرعىن ءۇي مەن 67 زاڭدى تۇلعا ۇزدىكسىز جىلۋمەن جابدىقتاۋعا قول جەتكىزە الادى. اۆاريالىق جاعدايلار مەن تەحنولوگيالىق بۇزۋشىلىقتاردىڭ تۋىنداۋ قاۋپى ازايادى, ورتالىقتاندىرىلعان جىلۋمەن جابدىقتاۋدىڭ ساپاسى مەن سەنىمدىلىگى ارتادى.

تۇراقتى جانە ساپالى جىلۋمەن قامتاماسىز ەتۋ ينفراقۇرىلىمدىق دامۋدىڭ ماڭىزدى ەلەمەنتى بولىپ سانالادى. مۇنداي جوبالاردى جۇزەگە اسىرۋ وڭىرلەردە ءومىر ءسۇرۋ دەڭگەيىن ارتتىرۋعا ىقپال ەتەدى.