كونفەرەنتسيادا ءسوز سويلەگەن دارحان قىدىرالى استانادا وتەتىن الەمدىك جانە ءداستۇرلى دىندەر كوشباسشىلارىنىڭ VIII سەزى قارساڭىندا وتكەن كەزدەسۋدىڭ ەرەكشە ءمانى بار ەكەنىن اتاپ ءوتتى. ونىڭ ايتۋىنشا, حالىقارالىق ىنتىماقتاستىقتى نىعايتۋ مەن دىندەر اراسىنداعى ءوزارا تۇسىنىستىك قاعيداتتارىن ىلگەرىلەتۋدە كونفەرەنتسيانىڭ ماڭىزى زور.
«مەملەكەت باسشىسى دىنارالىق ديالوگقا, كەلىسىم مەن ءوزارا تۇسىنىستىككە ەرەكشە ءمان بەرەدى. بۇل باعىتتا الەمدىك جانە ءداستۇرلى دىندەر ليدەرلەرى سەزىنىڭ حاتشىلىعى مەن پارلامەنت سەناتى تاراپىنان اۋقىمدى جۇمىس اتقارىلۋدا. مۇسىلمان اقساقالدار كەڭەسىنىڭ قىزمەتى دە قازاقستاننىڭ رۋحاني ديپلوماتيا سالاسىنداعى باعىت-باعدارىمەن ۇندەس بولىپ وتىر. وزگەرمەلى الەمدە رۋحاني باعدارلار مەن قاسيەتتى مۇرالاردى ساقتاۋ ماڭىزدى», دەپ اتاپ ءوتتى دارحان قىدىرالى.
كونفەرەنتسياعا قاتىسۋشىلار شارا سوڭىندا مۇنداي ديالوگ الاڭدارى دىندەر اراسىنداعى سەنىمدى نىعايتۋعا, قوعامداعى تولەرانتتىلىق دەڭگەيىن ارتتىرۋعا جانە تۇراقتى بەيبىتشىلىك پەن رۋحاني كەلىسىم ءۇشىن بەرىك نەگىز قالىپتاستىرۋعا ىقپال ەتەتىنىنە سەنىم ءبىلدىردى.
