ماسەلەن, كەشە «Amanat» پارتياسى فراكتسياسىنىڭ دەپۋتاتتارى «قازاقستان اۆياتسيا يندۋسترياسى» زاۋىتىنىڭ جاعدايىن باقىلاپ قايتتى. ستراتەگيالىق ماڭىزى بار نىسان – بىلتىر اقپاننان بەرى داعدارىستا. بۇگىندە ەلدەگى جالعىز اۆياتسيالىق-تەحنيكالىق ورتالىقتىڭ جۇمىسى شاتقاياقتاپ, 164 قىزمەتكەر جۇمىستان كەتكەن, ولاردىڭ 76-سى – جوعارى بىلىكتى وندىرىستىك ماماندار. انگاردا تۇرعان التى ۇشاق تا بەس جىلدان بەرى اۋەگە كوتەرىلمەگەن. ءتىپتى ەسەپشوتتارى مەن مۇلكى بۇعاتتالعان.
– زاۋىت جىلىنا ونعا دەيىن كۇردەلى جوندەۋ جۇرگىزۋگە قاۋقارلى. ءبىز جەڭىلدىك سۇراپ وتىرعان جوقپىز. بىزگە جۇمىس ىستەۋگە مۇمكىندىك بەرىلسە جەتكىلىكتى. بۇل زاۋىتتا ەلىمىز ۇزاق جىلدار بويى دايارلاعان ماماندار شوعىرلانعان. بارلىق قاجەتتى قۇرال-جابدىق, ءبىلىم, وندىرىستىك تىزبەك بار. الايدا ءبىز قازىردىڭ وزىندە جۇزدەن اسا ماماننان ايىرىلدىق. ەگەر جاعداي وزگەرمەسە, زاۋىتتان دا ايىرىلىپ قالامىز. ال ونىمەن بىرگە وتاندىق اۆياونەركاسىپتىڭ نەگىزىن قۇرايتىن بارلىق الەۋەت تە جوعالادى, – دەيدى «قازاقستان اۆياتسيا يندۋسترياسى» جشس باس ديرەكتورى قايرات جاۋحانوۆ.
زاۋىتتا ماماندار دا, سەرتيفيكاتتالعان قۇرال-جابدىقتار مەن ينفراقۇرىلىم دا بار. بىراق مەملەكەت تاراپىنان جۇيەلى قولداۋ مەن زاۋىتتىڭ بولاشاعىنا قاتىستى ناقتى شەشىم جەتىسپەيدى. دەپۋتاتتار بۇل ماسەلەنى جاۋاپتى مەملەكەتتىك ورگانداردىڭ دەڭگەيىنە دەيىن كوتەرۋدى كوزدەپ وتىر.
– مەملەكەت باسشىسى ناقتى ايتتى: وندىرىستىك قۋاتتاردى ارتتىرىپ, شاعىن اۆياتسيانى دامىتۋ قاجەت. وتاندىق كاسىپورىندارعا قولداۋ كورسەتۋ كەرەك. بۇل زاۋىت وسى مىندەتتەردى ورىنداۋعا تولىق قاۋقارلى. بىراق قازىر زاۋىت جۇمىس ىستەمەي تۇر. سەبەبى ول دارمەنسىز ەمەس, ونى تىعىرىققا تىرەگەن. تاپسىرىستىڭ جوقتىعى, جەرگە قاتىستى داۋلار مەن دەر كەزىندە وتەلمەگەن قارىزدار – مۇنىڭ ءبارى ۇيىمداستىرۋشىلىقتىڭ جوقتىعىن كورسەتەدى. ەلىمىزدىڭ تەحنيكالىق اۆياتسياسىن قايتا كوككە كوتەرۋگە, قورعانىس الەۋەتىن كۇشەيتۋگە قاۋقارلى زاۋىتتىڭ سالعىرتتىقتىڭ كەسىرىنەن جابىلىپ قالۋىنا جول بەرمەيمىز. بۇل ماسەلەنى پارلامەنتتە دە كوتەردىك. ەندى ناقتى مەرزىمى مەن مىندەتتەمەلەرى بار شەشىمدەردى تالاپ ەتەمىز, – دەدى ءماجىلىس دەپۋتاتى, «Amanat» پارتياسى فراكتسياسى جەتەكشىسىنىڭ ورىنباسارى پاۆەل كازانتسەۆ.
ال شىعىس قازاقستانعا اياق باسقان ماجىلىسمەن ەرلان سايروۆ وڭىردەگى جاڭا مەكتەپتىڭ قۇرىلىس بارىسىن تەكسەردى. وسكەمەن قالاسى ءى.ەسەنبەرلين كوشەسىندەگى 600 ورىندىق ءبىلىم ورداسى «Amanat» پارتياسىنىڭ سايلاۋالدى باعدارلاماسى مەن «كەلەشەك مەكتەپتەرى» ۇلتتىق جوباسى اياسىندا سالىنىپ جاتىر. مۇندا زامان تالابىنا ساي حيميا جانە روبوتتەحنيكا كابينەتتەرى, كىتاپحانا, ليفت, اسحانا, ينكليۋزيۆتى ورتا, پاندۋستار مەن تاكتيلدى جولاقتار قاراستىرىلعان.
– دەگەنمەن وسىنداي ءبىلىم ورداسىندا ىنتالى, بىلىكتى مۇعالىمدەر جۇمىس ىستەمەسە, بۇل ءىستىڭ ءمانى شامالى. «پەداگوگ مارتەبەسى تۋرالى» زاڭ ارقىلى كەيىنگى جىلدارى تەك جالاقىنى كوتەرىپ قانا قويعان جوقپىز, مەكتەپكە ۇزدىكتەردى تارتۋعا, ولاردى دامىتۋعا مۇمكىندىك بەرەتىن جاعداي جاسادىق. بۇل – ساپالى ءبىلىم بەرۋدىڭ بەرىك ىرگەتاسى, – دەدى دەپۋتات ە.سايروۆ.
قىس مەزگىلىندە تارازدىقتار جىلۋسىز قالماۋى ءۇشىن ءماجىلىس دەپۋتاتتارى مۇقاش ەسكەندىروۆ پەن گۇلدارا نۇرىموۆا تاراز قالاسىنداعى م-1 جىلۋ ماگيسترالىن جاڭارتۋ جوباسىنىڭ جۇزەگە اسىرىلۋ بارىسىن باقىلادى. 1990 جىلى سالىنعان بۇل ماگيسترالدىڭ نەگىزى پايدالانۋ مەرزىمى وتكەن. 2023 جىلدىڭ باسىندا توزۋ دەڭگەيى 80 پايىزعا جەتكەن ەدى.
قازىر تارازدا جىلۋ جەلىلەرىن جاڭارتۋ جۇمىستارى جۇيەلى جالعاسىپ جاتىر. وتكەن جىلى 4 602 مەتر قۇبىر اۋىستىرىلسا, بيىل جىل اياعىنا دەيىن تاعى 1 536 مەترى جاڭارتىلادى.
– ادامداردىڭ ءومىر ءسۇرۋ ساپاسىن ارتتىرۋ ءۇشىن ەڭ الدىمەن ۇيلەردە جىلۋ, ىستىق سۋ جانە كارىز جۇيەسىنىڭ دۇرىس جۇمىس ىستەۋى قاجەت. تارازدا جىلۋ جەلىلەرى ماسەلەسى ونداعان جىل بويى شەشىلمەي كەلگەن. ەندى بۇعان كوز جۇما قاراۋعا بولمايدى. تۇرعىندار قىس مەزگىلىندە جىلۋدان تارىقپاي ءومىر ءسۇرۋى كەرەك, – دەدى دەپۋتات م.ەسكەندىروۆ.
ءماجىلىس دەپۋتاتى ەكاتەرينا سمولياكوۆا الماتى وبلىسىنداعى تالعار جانە قوناەۆ قالاسىندا بولىپ, جەرگىلىكتى كاسىپكەرلەرمەن كەزدەستى. جۇزدەسۋدە ىشكى تۋريزمدەگى كۇرمەۋلى ماسەلەلەردى تالقىلادى. بۇعان دەيىن «Respublica» پارتياسى فراكتسياسىنىڭ مۇشەسى پرەمەر-مينيسترگە ساۋال جولداپ, ىشكى ءتۋريزمدى رەتتەۋ, نارىقتى زاڭسىز باسەكەدەن قورعاۋ جانە زاڭنامانى جاڭعىرتۋ قاجەتتىلىگى جونىندە وتكىر ماسەلەلەردى كوتەرگەن ەدى.
– تۋريزم – جاي عانا دەمالىس ەمەس, بۇل ەلدىڭ كەلبەتى, جۇمىس ورىندارى, ينۆەستيتسيا تارتۋ جانە وڭىرلەردىڭ ءوسۋ نۇكتەسى. ەگەر ءبىز ونىڭ شىنىمەن دە ەكونوميكانىڭ قوزعاۋشى كۇشى بولعانىن قالاساق, وندا بيزنەسكە دامۋعا مۇمكىندىك بەرۋىمىز قاجەت, – دەدى ە.سمولياكوۆا.
حالىق اماناتىن ارقالاعان دەپۋتاتتار ءار ايماقتىڭ پروبلەماسىمەن جاقىن تانىسۋدان بولەك, سايلاۋشىلارعا قابىلدانعان زاڭداردىڭ مəن-جايىن جەتە ءتۇسىندىرىپ ءجۇر. ولاردىڭ وڭىرلەرگە ساپارى شىلدە ايىنىڭ 10-ىنا دەيىن جالعاسادى.
