فوتو: اشىق دەرەككوز
ينۆەستيتسياعا ارنالعان تاريف ەلەكتر ستانتسياسى مەن جەلى يەلەرىنە ءوز اكتيۆتەرىن ءتيىمدى ۇستاۋ ءۇشىن كوبىرەك اقشا جيناۋعا مۇمكىندىك بەرەدى. ەنەرگەتيكا مينيسترلىگى كوتەرمە ساۋدا نارىعىندا جابىق باسەكەلەستىك ورناتتى جانە ەلەكتر ستانتسيالارىنا ارنالعان بارلىق تاريفتەر مينيسترلىكتىڭ بۇيرىعىمەن بەلگىلەنەدى.
«بۇل - ەكونوميكامىزدا ەڭ ۇلكەن سىبايلاس جەمقورلىق تاۋەكەلدەرىن تۋدىرادى. ءتاريفتىڭ نەبارى 1 تەڭگەگە شامادان تىس كوتەرىلۋى ەلەكتر ستانتسيالارىنىڭ يەلەرىنە جىلىنا جالپى العاندا 100 ميلليارد تەڭگەگە جۋىق تابىس اكەلەدى جانە ولار ءتاريفتىڭ شەكتەن تىس كوتەرىلۋىنە ۇلكەن ىنتالاندىرۋعا يە. بۇعان جول بەرمەۋدىڭ جالعىز جولى – نارىقتى اشۋ جانە باعا بەلگىلەۋدى توقتاتۋ. 1998 جىلى كوتەرمە نارىقتاعى تاريف نارىقتىق كۇشتەردىڭ ارەكەتىنەن 3 ەسەگە تومەندەدى», دەيدى تاۋەلسىز ساراپشى اسەت ناۋرىزباەۆ.
پرەزيدەنت جانىنداعى قسزي ەكونوميكالىق ساياساتتى تالداۋ ءبولىمىنىڭ باس ساراپشىسى اسەل ابەننىڭ ايتۋىنشا باعدارلامانى ىسكە اسىرۋعا 3 تريلليون تەڭگە قاراستىرىلعان. بولىنگەن قارجىعا 61,9 مىڭ شاقىرىمدى قۇرايتىن ينجەنەرلىك جەلىنى جاڭارتۋ ارقىلى توزۋ دەڭگەيىن 20%-عا دەيىن تومەندەتۋ جۇمىستارى بەكىتىلگەن.
«الايدا باعدارلامانى ىسكە اسىرۋ بارىسىندا بىرقاتار شەكتەۋلەر ورىن الدى. ينفراقۇرىلىمدىق جوبالاردىڭ وتەلۋ مەرزىمىنىڭ ۇزاقتىعى ولاردى بيزنەس ءۇشىن تارتىمدىلىعىن تومەندەتەدى. قىزمەت ساپاسى جاقسارعانىنا قاراماستان, تاريفتەردىڭ ءوسۋى الەۋمەتتىك شيەلەنىستى تۋدىرىپ, اسىرەسە تابىسى تومەن حالىق اراسىندا نارازىلىققا اكەلۋى مۇمكىن. سونىمەن قاتار, كەيبىر وڭىرلەردە تەحنيكالىق جاعىنان كۇردەلى جوبالاردى جۇزەگە اسىرۋعا قابىلەتتى مەردىگەرلىك ۇيىمدار مەن بىلىكتى ماماندار جەتىسپەيدى. مۇنىڭ بارلىعى جاڭعىرتۋ قارقىنىنىڭ باياۋ جۇمىس ىستەۋىنە جانە شىعىنداردىڭ ارتۋىنا سەبەپ بولۋى مۇمكىن», دەيدى ساراپشى.
