ءبىر اپتاعا ءدۇبىرلى دودا استاناداعى جاقسىلىق ۇشكەمپىروۆ اتىنداعى جەكپە-جەك سارايىندا تۇڭلىگىن تۇرەدى. بۇل – ەلىمىزدەگى ەڭ ءىرى سپورت كەشەندەرىنىڭ ءبىرى جانە تولىقتاي مۇمكىندىگى شەكتەۋلى سپورتشىلارعا بەيىمدەلگەن نىسان.
حالىقارالىق بوچچا فەدەراتسياسىنىڭ (BISFed) اياسىندا وتەتىن جاھاندىق دودا 2028 جىلى لوس-اندجەلەستە جالاۋى جەلبىرەيتىن پاراليمپيادا ويىندارىنا ىرىكتەۋ ءارى رەيتينگتىك ۇپايلار جيناۋعا زور مۇمكىندىك بەرمەك. الەمدىك ءتۋرنيردىڭ بىزدە وتكىزىلۋى – ەلىمىزدىڭ دۇنيەجۇزىلىك دودالاردى ۇيىمداستىرۋداعى جەتىستىگى مەن تاجىريبەسىن ايگىلەي تۇسسە كەرەك.
ء«تۋرنيردىڭ استانادا وتكىزىلۋى قازاقستاننىڭ پاراليمپيادالىق قوزعالىستاعى بەلسەندى قاتىسۋشى رەتىندەگى پوزيتسياسىن نىعايتىپ, ەلدىڭ بارشاعا تەڭ مۇمكىندىك جاساۋعا دەگەن ۇمتىلىسىن ايقىندايدى. بۇل تەك ماڭىزدى سپورتتىق شارا عانا ەمەس, سونداي-اق تاجىريبە الماسۋعا, حالىقارالىق ىنتىماقتاستىقتى دامىتۋعا سونداي-اق ينكليۋزيۆتى سپورت تۇرلەرىن تانىمال ەتۋگە دە سەرپىن بەرمەك. قازىرگى ۋاقىتتا تۋرنيرگە ەۋروپا, ازيا جانە تاياۋ شىعىس ەلدەرىن قوسا العاندا, 14 مەملەكەت قاتىساتىنىن راستادى. سپورتشىلار جەكە, جۇپتىق جانە كوماندالىق سايىستا باعىن سىنايدى», دەدى قازاقستان بوچچا فەدەراتسياسىنىڭ ۆيتسە-پرەزيدەنتى نازىم جانعازى.
قازاقستان بوچچا فەدەراتسياسى 2021 جىلى قۇرىلعان ساتتەن جۇمىسى جاندانىپ كەلەدى. فەدەراتسيانىڭ 10 وڭىردە فيليالدارى اشىلىپ, 250-دەن استام بالا مەن ەرەسەك تۇراقتى تۇردە جاتتىعۋعا قاتىسادى. بوچچا جاتتىعۋلارى قازاقستاننىڭ 20 قالاسىندا تۇراقتى وتەدى.
ەلىمىزدە بوچچا سپورتى العاش رەت 2018 جىلى ەرەكشە قاجەتتىلىكتەرى بار بالالاردىڭ اتا-انالارى ۇيىمداستىرعان سەكتسيا ەسەبىندە قولعا الىندى. 2021 جىلى قازاقستان بوچچا فەدەراتسياسى قۇرىلدى, ال 2023 جىلى حالىقارالىق بوچچا فەدەراتسياسىنىڭ (BISFed) رەسمي مۇشەسى اتاندى.
«قازاقستان ۇلتتىق قۇراماسى 2022 جىلدان بەرى ءىرى حالىقارالىق جارىستارعا قاتىسىپ كەلەدى. وسى ۋاقىت ىشىندە سپورتشىلارىمىز ءارتۇرلى دارەجەدەگى مەدالدارعا يە بولدى. قازاقستان قۇراماسى BISFed رەيتينگىندە 50-دەن استام ەل اراسىندا 18-ورىندا تۇر. ءبىز اقش, يسپانيا سياقتى الدىڭعى قاتارلى قۇرامالاردان دا جوعارىمىز. ال ورتالىق ازيادا ءابسوليۋتتى كوشباسشىعا اينالدى. سوڭعى ءۇش جىلدا 12 سپورت شەبەرى شىقتى», دەيدى قازاقستان بوچچا فەدەراتسياسىنىڭ سپورت ديرەكتورى ديار سەيتوۆ.
حالىقارالىق ىنتىماقتاستىقتىڭ قارقىندى دامىپ, بىلتىر ۇلىبريتانيا, ءۇندىستان, تايلاند جانە وڭتۇستىك كورەيادان كەلگەن ساراپشىلاردىڭ قاتىسۋىمەن حالىقارالىق باپكەرلەر مەن تورەشىلەرگە ارنالعان كۋرستار وتكىزىلدى. بيىل دا يگى ءىس جالعاسىن تاپتى. 15-تەن استام جاتتىقتىرۋشى مەن 20 تورەشى دايىندىقتان ءوتىپ, سەرتيفيكات الدى. وسى جىلى قازاقستان قۇراماسى بىرنەشە حالىقارالىق وقۋ-جاتتىعۋ جيىندارىنا شاقىرتۋ الدى.
بوچچا — تىرەك-قيمىل اپپاراتى زاقىمدانعان ادامدارعا ارنالعان دالدىككە نەگىزدەلگەن سپورتتىق ويىن. ول بوۋلينگ, پەتانك نەمەسە بوۋلزعا ۇقسايدى. ويىن ماقساتى — ءتۇرلى-ءتۇستى شارلاردى اق شارعا (دجەك) بارىنشا جاقىن ورنالاستىرۋ. جەڭىمپاز — قارسىلاسقا قاراعاندا ءوز شارلارىن دجەككە جاقىن تاستاعان ويىنشى, جۇپ نەمەسە كوماندا.
بۇل سپورتتا كۇش نەمەسە جىلدامدىقتان گورى دالدىك, ستراتەگيا جانە باقىلاۋ ماڭىزدى. ءبىر ويىن 30–60 مينۋتقا دەيىن سوزىلادى, كەيدە جەڭىس ميلليمەترلەرمەن شەشىلەدى. 1984 جىلدان باستاپ پاراليمپيادا ويىندارىنىڭ باعدارلاماسىنا ەنگەن.
قازاقستان قۇراماسى قۇرامىندا 10 سپورتشى بار. ونىڭ ىشىندە ۇشەۋى BC3 كلاسىنا جاتادى — ولاردا قوزعالىس شەكتەۋلەرى وتە اۋىر, سوندىقتان ولار دوپتى وزدەرى قوزعاي المايدى. وسى سەبەپتى ولار ارنايى رامپا ارقىلى ويىن ورىسىنە دوپتى باعىتتايدى جانە رامپا-وپەراتورمەن بىرگە جارىس الاڭىنا شىعادى.
ەلىمىزدىڭ بوچچا قۇراماسى حانچجوۋدا وتكەن ازيا پاراليمپيادا ويىندارىندا كوماندالىق جارىستا 8-ورىن الدى. بىلتىر باحرەيندەگى ىرىكتەۋ چەللەندجەرىندە كوماندالىق جارىستا 3-ورىن يەلەندى. المات ەرحات — باحرەيندە وتكەن الەمدىك چەللەندجەردە كۇمىس, ىرىكتەۋ چەللەندجەرىندە قولا جۇلدەگەر اتاندى.
بيىلعى قىركۇيەكتە وڭتۇستىك كورەيادا وتەتىن الەم كۋبوگىنا ءبىزدىڭ قۇراما العاشقى رەت قاتىسپاق. ۇلتتىق قۇرامانى ديانا مولداحمەتوۆا جاتتىقتىرادى.
