مەديا سالاسى قىزمەتكەرلەرىنە باسپانا بەرۋ باستاماسى — ازاماتتاردى الەۋمەتتىك قولداۋدى كۇشەيتۋ جانە قوعامدىق تۇراقتىلىقتى نىعايتۋعا باعىتتالعان كەڭ اۋقىمدى مەملەكەتتىك ساياساتتىڭ ءبىر بولىگى.
سالتاناتتى ءراسىم بارىسىندا قر پرەزيدەنتىنىڭ كەڭەسشىسى – ءباسپاسوز حاتشىسى رۋسلان جەلدىباي باق قىزمەتكەرلەرىن كاسىبي مەرەكەسىمەن قۇتتىقتادى.
«مەملەكەت باسشىسى قاسىم-جومارت توقاەۆتىڭ تاپسىرماسىمەن بيىل ءۇشىنشى جىل قاتارىنان جۋرناليستەرگە پاتەر بەرۋ شاراسى ۇيىمداستىرىلىپ وتىر. بۇل – پرەزيدەنتتىڭ وتاندىق مەديا قىزمەتكەرلەرىنە دەگەن ۇلكەن قولداۋى. بيىل پاتەرلەر تەك جۋرناليستەرگە عانا ەمەس, رەجيسسەرلەرگە, وپەراتورلارعا, كوررەكتورلارعا جانە وتاندىق مەديانىڭ وزگە دە ماماندارىنا بەرىلەدى. سونىمەن قاتار ءبىز الەۋمەتتىك وسال توپتارعا ەرەكشە نازار اۋداردىق: پاتەر يەلەرىنىڭ قاتارىندا كوپبالالى جانە مۇمكىندىگى شەكتەۋلى بالا تاربيەلەپ وتىرعان وتباسىلار دا بار. ارىپتەستەرىمىزدىڭ جەتىستىكتەرىنە قۋانىشتىمىز. بارشاڭىزدى شىن جۇرەكتەن قۇتتىقتايمىن!», دەدى رۋسلان جەلدىباي.
پاتەر سەرتيفيكاتتارىنا «Qazaqstan» رەسپۋبليكالىق تەلەراديوكورپوراتسياسى, «حابار» اگەنتتىگى» اق, «Qazcontent» اق, «قازاق گازەتتەرى» جشس, «ەۆرازيا+ورت» جشس, «Atameken Business» مەدياحولدينگى, Tengrinews جانە باسقا دا مەديا ۇيىمداردىڭ قىزمەتكەرلەرى يە بولدى.
«مەملەكەت باسشىسىنىڭ باق وكىلدەرىن باسپانامەن قامتاماسىز ەتۋ باستاماسىن «دارا» قورى ءساتتى جۇزەگە اسىرىپ كەلەدى. قوعامعا وڭ اسەر ەتەتىن جانە ازاماتتاردىڭ ءال-اۋقاتىن جاقسارتاتىن جوبالاردى ىسكە اسىرۋ – ءبىزدىڭ نەگىزگى قۇندىلىقتارىمىزدىڭ ءبىرى بولىپ قالا بەرەدى», دەپ اتاپ ءوتتى «دارا» پرەزيدەنتتىك باستامالار قورىنىڭ جەتەكشىسى مۇحامەدقالي تاۋان.
