فوتو: اشىق دەرەككوز
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, قانداستاردىڭ باسىم بولىگى قىتاي (45,8%) جانە وزبەكستاننان (41,2%) كەلگەن. سونداي-اق تۇرىكمەنستان (5,5%), موڭعوليا (2,6%), رەسەي (2,4%) جانە باسقا ەلدەردەن (2,5%) كەلگەن ازاماتتار دا بار.
«وسى جىلعى 1 ماۋسىمداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 60,1%-دى, ەڭبەككە قابىلەتتى جاستان كىشى 31%-دى جانە زەينەتكەرلەر 8,9%-دى قۇرايدى. ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 17%-ى جوعارى ءبىلىمدى, 27,4%-ى ورتا كاسىبي ءبىلىمدى, 53,2%-ى جالپى ورتا ءبىلىمدى, جانە 2,4% ءبىلىم جوق», دەلىنگەن حابارلامادا.
ەتنيكالىق قازاقتار ەلدىڭ ءار ايماعىنا قونىستانىپ جاتىر. الايدا ەڭبەك كۇشى تاپشى ايماقتارعا, اتاپ ايتساق اقمولا, اباي, قوستاناي, پاۆلودار, اتىراۋ, باتىس, شىعىس جانە سولتۇستىك قازاقستان وبلىستارىنا باسىمدىق بەرىلەدى. بۇل وڭىرلەرگە 2025 جىلعا ارنالعان قانداستاردى قابىلداۋ كۆوتاسى 2 309 ادامدى قۇرايدى. جىلدىڭ العاشقى بەس ايىندا بۇل ايماقتارعا 917 قانداس قونىس اۋدارعان.
«اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى – ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (275,2 مىڭ تەڭگە) مولشەرىندە; تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (59-دان 118 مىڭ تەڭگەگە دەيىن) مولشەرىندە. جىل باسىنان بەرى 340 قانداسقا ءتۇرلى قولداۋ شارالارى كورسەتىلدى. اتاپ ايتقاندا, 163 ادام تۇراقتى جۇمىسقا ورنالاستىرىلدى», دەلىنگەن حابارلامادا.
ايتا كەتەيىك, سولتۇستىك وڭىرلەرگە ەرىكتى كوشۋ تەتىكتەرىنىڭ تيىمدىلىگىن ارتتىرۋ ماقساتىندا جۇمىس بەرۋشىلەردى ىنتالاندىرۋعا باعىتتالعان جاڭا ينستيتۋتسيونالدىق شارالار قابىلدانعان. ونىڭ اياسىندا تۇرعىن ءۇي ساتىپ الۋ نەمەسە سالۋ, سونداي-اق يپوتەكالىق نەسيەلەر بويىنشا باستاپقى جارنانى جابۋ ءۇشىن ەكونوميكالىق ۇتقىرلىق سەرتيفيكاتى ەنگىزىلگەن. بۇل سەرتيفيكات ءبىر وتباسىعا تۇرعىن ءۇي قۇنىنىڭ 50%-ىنا دەيىن, نەمەسە 4,56 ملن تەڭگەگە دەيىن قايتارىمسىز نەگىزدە بەرىلەدى.
