«قورعاس-شىعىس قاقپاسى» اەا-داعى حالىقارالىق جۇك جانە جولاۋشىلار اۋەجايىنىڭ جوباسى ICAO حالىقارالىق ۇسىنىمدارىنا سايكەس اۆياتسيالىق ينفراقۇرىلىم سالۋدىڭ ءۇش كەزەڭدى باعدارلاماسىن كوزدەيدى. ءبىرىنشى كەزەڭ شەڭبەرىندە 2027 جىلعا دەيىن وتكىزۋ مۇمكىندىگى ساعاتىنا 50 ادامعا دەيىن جولاۋشىلار تەرمينالى (2032 جىلعا قاراي – ساعاتىنا 500 ادامعا دەيىن) سالىنباق. وندا JET A-1 اۆياوتىنى جاڭا ءتۇرىنىڭ زاماناۋي وتىن قويماسىنىڭ كولەمى جىلىنا 200 مىڭ تونناعا دەيىن (2032 جىلعا قاراي – 550 مىڭ تونناعا دەيىن) ۇلعايادى. جاڭا اۋەجايدىڭ اۆتوتۇراعىنا قوسا جىلىنا 50 مىڭ توننا تەمىرجول تۇيىعى بار جۇك تەرمينالىن (2032 جىلعا قاراي – جىلىنا 250 مىڭ تونناعا دەيىن) سالۋ جوسپارلانىپ وتىر.
ەكىنشى جانە ءۇشىنشى كەزەڭدەر شەڭبەرىندە 2032 جىلعا دەيىن تۋريستىك جانە ويىن-ساۋىق ينفراقۇرىلىمى قولعا الىنباق. ينۆەستيتسيالاردىڭ جالپى كولەمى – شامامەن 250 ملرد تەڭگە. سونداي-اق جوبادا «Air–Rail–Auto-Air» جۇك تاسىمالدارىنىڭ مۋلتيمودالدى سىزباسىن ازىرلەۋ, ازيا-تىنىق مۇحيتى ايماعى باعىتىنداعى كولىك پەن لوگيستيكالىق مارشرۋتتاردىڭ تۇيىسكەن جەرىندە ەكونوميكالىق ءوسۋدىڭ جاڭا مۇمكىندىكتەرىن اشۋ كوزدەلگەن.
«مەملەكەت باسشىسى قاسىم-جومارت توقاەۆ قازاقستان ەكونوميكاسى قۇرىلىمىن ءارتاراپتاندىرۋ جونىندەگى اۋقىمدى جۇمىس شەڭبەرىندە كولىك-لوگيستيكا سالاسىن باسىم باعىتتاردىڭ ءبىرى رەتىندە اتادى. جەتىسۋ وبلىسىندا زاماناۋي اۋەجاي سالۋ جوباسىن جۇزەگە اسىرۋ ينفراقۇرىلىمدى دامىتۋعا ەلەۋلى سەرپىن بەرەدى. سونىمەن قاتار قازاقستاننىڭ قىتاي, ورتالىق ازيا جانە ەۋروپا اراسىنداعى ترانزيتتىك حاب رەتىندەگى ءرولىن نىعايتادى», دەدى و.بەكتەنوۆ.
«Skyhansa» كومپانياسىنىڭ تەڭ قۇرىلتايشىسى, ديرەكتورلار كەڭەسىنىڭ مۇشەسى, دوكتور كريستين گريوتتسباح جوبانىڭ اۆياتسيالىق ينفراقۇرىلىمدى دامىتۋمەن قاتار وڭىردە زاماناۋي لوگيستيكالىق جانە ىسكەرلىك ورتالىق قالىپتاستىرۋدىڭ ماڭىزدىلىعىنا توقتالدى. ء«بىز جاي عانا اۋەجاي ەمەس, حالىقارالىق دەڭگەيدەگى دامىعان ينفراقۇرىلىمى, ونىڭ ىشىندە جۇك جانە جولاۋشىلار تەرمينالدارى, جانارماي قۇيۋ كەشەنى, اۋە كەمەلەرىنە اۆياتسيالىق-تەحنيكالىق قىزمەت كورسەتۋ ورتالىعى (MRO), بيزنەس ورتالىعى, مۋلتيمودالدى لوگيستيكالىق مۇمكىندىكتەرگە ارنالعان قوناقۇيلەرى بار كوپفۋنكتسيونالدى وڭىرلىك حاب قۇرىپ جاتىرمىز. ونىڭ قىتايمەن شەكاراعا جاقىن ورنالاسۋى «قورعاس – شىعىس قاقپاسى» اەا شەڭبەرىندە حالىقارالىق ساۋدانى دامىتۋعا مۇمكىندىك بەرەدى. ال ونىڭ تەمىرجول مەن اۆتوجول جەلىلەرىنە قوسىلۋى جاڭا جىبەك جولىنداعى كەلەشەگى زور لوگيستيكالىق توراپتاردىڭ بىرىنە اينالدىرادى», دەپ اتاپ ءوتتى دوكتور كريستين گريوتتسباح.
كەزدەسۋ سوڭىندا كولىك مينيسترلىگى مەن «Skyhansa» اراسىندا ينۆەستيتسيالار تۋرالى كەلىسىمگە قول قويىلدى. قۇجاتقا سايكەس, ينۆەستور قاجەتتى اۆياتسيالىق ينفراقۇرىلىم قۇرىلىسىنا نەگىزىنەن وتاندىق ماتەريالدار مەن قىزمەتتەردى پايدالانىلادى. سونداي-اق جوبانى جۇزەگە اسىرۋعا قىزمەتكەرلەردىڭ كەمىندە 90%-ى قازاقستان ازاماتتارى بولادى. بۇل جاڭا جۇمىس ورىندارىنىڭ اشىلۋىنا سەرپىن بەرمەك. يگى ءىستى جۇزەگە اسىرۋدا ءبىزدىڭ تاراپ ينجەنەرلىك جانە كولىك ينفراقۇرىلىمىن تارتىپ, ارنايى ەكونوميكالىق ايماققا قاتىسۋشىلارعا ماقساتتى جەڭىلدىكتەر قاراستىرماق.
جوبا «Skyhansa» بىرلەسكەن قازاقستاندىق-گەرماندىق كاسىپورنىنىڭ قاتىسۋىمەن جۇزەگە اسىرىلىپ جاتىر. گەرمانيا تاراپىنان سەرىكتەس رەتىندە اۆياتسيالىق تەرمينالدار مەن ينفراقۇرىلىمدى دامىتۋ بويىنشا جوعارى قىزمەت كورسەتەتىن «The Hansa Consortium» كومپانياسى, قازاقستان تاراپىنان – قازاقستان, ورتالىق ازيا جانە كاۆكاز نارىعىنداعى اۋەجايلار ءۇشىن كەشەندى قىزمەتتەر مەن ينجينيرينگتىك شەشىمدەر ۇسىناتىن «Skymax Technologies» كومپانيالار توبى جۇمىلدىرىلادى.
