«بيۋدجەت تاپشىلىعى – داعدارىستىڭ ەمەس, دامۋدىڭ كورىنىسى. ول ءاردايىم جاعىمسىز دۇنيە رەتىندە قاراستىرىلماۋى كەرەك. كەيدە مەملەكەت ءۇشىن ءدال قازىرگى ساتتە كوبىرەك جۇمساۋ بولاشاقتاعى تۇراقتىلىق پەن ءوسىمنىڭ العىشارتى بولادى. بۇل اسىرەسە ينفراقۇرىلىم, ءبىلىم, مەديتسينا سەكىلدى سالالارعا قاتىستى. كەيىنگى 20 جىلدا ءىجو-ءنىڭ 2-3%-ى شەگىندەگى تاپشىلىقپەن ءومىر ءسۇرىپ كەلەمىز. بۇل – حالىقارالىق تاجىريبەدە قاۋىپسىز كورسەتكىش. دامىعان ەلدەردە بۇل شەك 5-8%-عا دەيىن جەتىپ جاتادى. ال ءبىز ءالى كۇنگە دەيىن مۇنداي قالىپتى جاعدايدان ۇرەي كورەمىز. بىزدە, وكىنىشكە قاراي, ۇلتتىق قوردان ترانسفەرت ازايۋى تاپشىلىقتى ۆيزۋالدى تۇردە ۇلكەيتىپ كورسەتىپ وتىر», دەيدى ەكونوميست ولجاس قۇدايبەرگەنوۆ.
سارالاپ قاراساق, تاپشىلىقتىڭ نەگىزگى سەبەبى – ۇلتتىق قوردان تۇسەتىن ترانسفەرتتەردىڭ ازايۋى. جوسپارلانعان 3,875 ترلن تەڭگەنىڭ ورنىنا 2,62 ترلن تەڭگە عانا ءبولىندى. سونىڭ ىشىندە, 2 ترلن تەڭگە – كەپىلدەندىرىلگەن ترانسفەرت, 620 ملرد تەڭگە – ماقساتتى ترانسفەرت. بۇل ۇدەرىس تاپشىلىقتىڭ تەرەڭدەۋىنە اسەر ەتتى.
«تاپشىلىقتى ازايتقىمىز كەلسە, وندا كولەڭكەلى ەكونوميكامەن كۇرەستى ءبىرىنشى ورىنعا قويۋىمىز كەرەك. قازىر ءىجو-ءنىڭ كەمىندە 30%-ى, ەڭبەكاقى تولەمدەرىنىڭ 50%-ى كولەڭكەدە ءجۇر. بۇل قازىنادان ۇلكەن رەزەرۆ جاسىرىنىپ جاتقانىن بىلدىرەدى. وسى كولەمدى اشىق ەكونوميكاعا الىپ شىعۋ ارقىلى عانا تاپشىلىقتى تۇبەگەيلى قىسقارتا الامىز. قازىرگى بيۋدجەتتىڭ قۇرىلىمى – ەسكى جۇيە. ول 2000 جىلدارداعى جاعدايعا بەيىمدەلىپ جاسالعان. سونى وزگەرتسەك ەلىمىز 3-4 جىلدا پروفيتسيتتىك بيۋدجەتكە شىعادى», دەيدى ساراپشى.
